چالاكیی هونەریی لە هونەرمەند شەمس كوێتی لە عێراق قەدەغە كرا
سەندیكای هونەرمەندانی عێراق، بڕیاری دا بە قەدەغەكردنی هونەرمەندی گۆرانیبێژی ناسراوی عەرەب "شەمس كوێتی" لە چالاكیی هونەری لە عێراق تا ماوەی ساڵێكی دیكە.
سەندیكاكە هۆكاری ئەو بڕیارەی بۆ ئەوە گەڕاندووەتەوە كە شەمس كوێتی لە لێدوان و قسەكانیدا هێرشی كردووەتە سەر سیاسەتمەدارانی عێراق، بەتایبەت لە ڤیدیۆیەكدا كە لە چەند رۆژی رابردوودا لە تۆڕە كۆمەڵایەتییەكان بڵاو بووەتەوە.
سەندیكای هونەرمەندانی عێراق ئاماژەی بە ئەوەش داوە بڕیارەكە بە شێوەیەكە كە تاوەكوو ساڵێكی دیكە ئەو هونەرمەندە رێگەی پێ نەدرێت تەنانەت بێتە نێو خاكی عێراقیشەوە، ئەمەش لە رێگەی هێزە ئەمنییەكانەوە جێبەجێ دەكرێت.
پێشووتر شەمس كوێتی، چەندین لێدوانی داوە و كاردانەوەی توندی لێكەوتووەتەوە، هونەرمەندەكە لە تۆڕە كۆمەڵایەتییەكان بەوە ناسراوە كە هێرش دەكاتە سەر كەسایەتییەكان و كلتوورە باوەكانی كۆمەڵگە بۆ ئەمەش چەندین جار داوا كراوە كە بدرێتە دادگا.