سەرۆکی ئەنجومەنی وەزیران محەمەد شەیاع سودانى، ئەمڕۆ دووشەممە پێشوازی کرد لە باڵیۆزی یەکێتی ئەوروپا لە عێرا تۆماس سایلەر و تاوتوێی پەیوەندییەکانی نێوان هەردوولایان کرد.

نوسینگەی راگەیاندنی سەرۆک وەزیران بڵاویکردەوە:-لە میانەی دیدارەکەدا تاوتوێی پەیوەندییە دوو قۆڵییەکانی نێوان عێراق و یەکێتی ئەوروپا و گرنگی ئاڕاستەکردنی هەوڵەکان کرا بۆ هەماهەنگی زیاتر و ئەنجامدانی هاوبەشی ئابووری بەرهەمدار لەگەڵ وڵاتانی یەکێتی ئەوروپادا.

هەروەها گفتوگۆیان لەسەر تواناکانی بەهێزکردنی هەماهەنگی لە بواری فڕۆکەوانی مەدەنی و ئەو ڕێوشوێنانە کرد کە گیراونەتەبەر بۆ دەستپێکردنەوەی گەشتە ئاسمانییەکانی عێراق لە ئاسمانی ئەوروپا.

هەر لە دیدارەکەدا باس لە هەماهەنگی کرا لەگەڵ بانکەکانی وەبەرهێنان و گەشەپێدان و ئاوەدانکردنەوەی ئەوروپا بۆ پتەوکردنی ئەزموون و پشتیوانیکردنی پرۆژەکانی پەرەپێدانی کەرتی تایبەت لە عێراق.

لە دیدارەکەدا تاوتوێی بارودۆخی تراژیدی غەزە و سیاسەتە دوژمنکار و تاوانکارییەکانی هێزەکانی داگیرکەر لە دژی هاوڵاتیانی سڤیل کرا و جەخت کرایەوە لەسەر پێویستی ڕاگرتنی هێرشەکان و گەیاندنی یارمەتی بۆ فەڵەستینییەکان.