شاندێکی دانوستکارانی پارتی سەردانی نەوەی نوێ کرد بە مەبەستی پێکهێنانی حکومەت

16:39 2024-11-27 165194 كوردستان 0

2024-11-27

165194

شاندێکی دانوستکارانی پارتی بە سەرۆکایەتیی پشتیوان سادق و شاندی نەوەی نوێ بە سەرۆکایەتیی رێبوار ئەورەحمان دوای نیوەڕۆی ئەمڕۆ چوارشەممە 27ـی تشرینی دووەم کۆبوونەوە.
شاندەکەی پارتی پێکهاتبوون لە پشتیوان سادق ئەندامی مەکتەبی سیاسی پارتی و دڵشاد شەهاب ئەندامی شاندی دانوستانکاری پارتی.
هاوکات شاندەکە لەلایەن ڕێبوار ئەورەحمان، کاوە عەبدولقادر و بەدریە ئیبراهیم، ئەندامانی شاندی دانوستانکاری نەوەی نوێ پێشوازیان لێکرا و گفتوگۆیان لەسەر پێکهێنانی کابینەی دەیەمی حکومەتی هەرێمی کوردستان کرد.
هەر لە سلێمانی، بڕیارە دوای نەوەی نوێ شاندەکەی پارتی سەردانی یەکێتیی و چەند لایەنێکی تر بکات لەسەر پێکهێنانی کابینەی نوێی حکومەت.
ئەمەش لەکاتێکدا، ڕۆژی 7ـی ئەم مانگە، میدیای جوڵانەوەی نەوەی نوێ ڕایگەیاندبوو، کە ئامادەن لەحکومەتدا بەشداربن ئەگەر پۆستی سەرۆک وەزیران بەدەست نەوەی نوێوە بێت یان تەواوی پۆستەکانی سەرۆکایەتی هەرێم، پەرلەمان و 23 وەزارەتەکە بەدەست ئەوانەوە بێت.
بەگوێرەی میدیای NRT نزیک لە نەوەی نوێ، بەپێی پرۆژەکەی نەوەی نوێ هەرلایەنێک سەرۆک وەزیران وەربگرێت تەواوی پۆستەکانی تر بۆ لایەنەکەی تر دەبێت.
نەوەی نوێ ڕاشیگەیاندبوو: ئێمە لەو لایەنانە نین کە بە سێ چوار وەزارەت رازی بین و بچینە حکومەت و ئامانجی ئێمە گۆرانکارییە لە حکومرانی و خزمەتکردنی خەڵکە، هەروەها ئامانجمان کۆتاییهێنانە بەو شێوازە شکستخواردوەی حکومرانی پارتی و یەکێتی کە لە رابردوودا هەبووە.

زانیاری زیاتر...
ئەو سەردانەی شاندی پارتی لەگەڵ نەوەی نوێ و لایەنەکان بۆ پێکهێنانی حکومەت، دوای ئەوە دێت کە دوێنێ سێشەممە 26ـی تشرینی دووەمی 2024، دڵشاد شەهاب، وتەبێژی سەرۆکایەتی هەرێمی کوردستان لە کۆنگرەیەکی ڕۆژنامەوانیدا ڕایگەیاندبوو، کە سەرۆکایەتی هەرێم ڕۆژی یەکەمی دانیشتنی خولی شەشەمی پەرلەمانی هەرێمی کوردستان دیاریکرد و گوتی: "ڕۆژی 2ـی تشرینی یەکەمی 2024، دانیشتنی یەکەمی خولی شەشەمی پەرلەمانی هەرێمی کوردستان بەڕێوەدەچێت".