سەرۆکی ئەنجومەنی وەزیران محەمەد شیاع سودانی، جەخت دەکاتەوە لەسەر ڕاهێنانی کارمەندانی ئەمنی تایبەتمەند بە ئاسایشی زانیاری و پاراستنی ئەلیکترۆنی بۆ ئەپڵیکەیشنەکانی خزمەتگوزاری و بەکارهێنانە داراییەکان، و ڕووبەڕووبوونەوەی هێرشە ئەلیکترۆنییە چاوەڕوانکراوەکان،دووپاتیشیکردەوە کەباوەڕمان بە ئەگەری دامەزراندنی پیشەسازییەکی عێراقی جیاواز هەیە.
نوسینگەی ڕاگەیاندنی سەرۆکی ئەنجومەنی وەزیران لەڕاگەیەندراوێکدا کەدەستی موتەڵع کەوتووە،بڵاویکردەوە"سەرۆکی ئەنجومەنی وەزیران و فەرماندەی گشتی هێزە چەکدارەکان محەمەد شەیاع سودانی، ئەمڕۆ شەممە سەرپەرشتی کردنەوەی چالاکیەکانی 13"ـەیەمین خولی پێشانگای ئاسایش و بەرگری و پیشەسازی سەربازی و ئاسایشی ئەلیکترۆنی کرد، کە لە بەغدای پایتەخت بەڕێوەدەچێت بە بەشداری 155 کۆمپانیا کە نوێنەرایەتی 24 وڵات دەکەن و 65 کۆمپانیای عێراقی تێدایە.
ئاماژەی بەوەشکرد،پێشانگاکە کە ئامادەبوونێکی دیپلۆماسی بەرچاوی بەخۆوە بینی، سەکۆیەکی ستراتیژی پێکدەهێنێت بۆ نمایشکردنی نوێترین داهێنان و تەکنەلۆژیاکان لەبوارەکانی بەرگری و ئاسایشی ئەلیکترۆنی و دابینکردنی چارەسەری بەرگری و تەکنەلۆژیای ئەمنی هاوچەرخ لەبوارەکانی پەیوەندیکردن و سیستمی چاودێری و کەرەستەی پۆلیس و ئامانج لێی بەهێزکردنی توانای بەرگری عێراق و کردنەوەی ئاسۆیەکی نوێیە بۆ هاوکاری نێودەوڵەتی لەبوارەکانی ئاسایش و ئاڵوگۆڕی ئەزموونەکانی نێوان دامەزراوەکان و پشتیوانی کردنی و پەرەپێدانی پیشەسازیی بەرگری نیشتمانی.
سودانی ستایشی هەوڵەکانی ڕێکخەرانی ئەم پێشانگایەی کرد، لەکاتێکدا بەڕێوەدەچێت کە عێراق  لەبواری خزمەتگوزاری و ژێرخان و کەرتەکانی کشتوکاڵ و وەبەرهێنان و وزە و پترۆکیمیاوییەکاندا گەشەیەکی بێ وێنە بەخۆوە دەبینێت، و جەختی لەوە کردەوە کە پێشانگاکە ببێتە سەکۆیەکی کاریگەر بۆ هاوبەشی زانستی و تەکنیکی لەنێوان کەرتی پیشەسازی عێراقی حکومی و تایبەت و کۆمپانیا بەشداربووەکاندا، و حکومەتیش پشتیوانی تەواو پێشکەش دەکات.

سەرۆک وەزیران ئاماژەی بەوەکرد حکومەت لەڕێگەی ئەم پێشانگایەوە هەوڵدەدات بنکەی پیشەسازی سەربازی لەعیراق فراوان بکات، پاش جێگیرکردنی بناغەکانی لەڕێگەی بەرهەمهێنانی کارگەی تایبەت بە کەرەستەی سووک و مامناوەند و پاشماوەی پێداویستییەکانی زنجیرەی تەکنەلۆژیاوە لە کەرەستەی پیشەسازی و نیمچە پیشەسازی و ماددە سەرەتاییەکان.

ئەمەی خوارەوە دەقی وتارەکەی بەڕێز سەرۆکی ئەنجومەنی وەزیرانە کەدەستی موتەڵع کەوتووە:

? بەغدا جارێکی تر وەک ناوەندێکی چالاکی گەشەپێدان و سەنتەری دروستکردنی دەرفەت و کۆکردنەوەی هەوڵە زانستی و تەکنەلۆژیا و پیشەسازیەکان دەردەکەوێت.

? ئاماژە و ڕاستییە دیجیتاڵییەکان ئەوە دەردەخەن کە توانای پیشەسازی لەعیراقدا گەورەیە و لەسەرەتای مێژووەوە وڵاتێکی پیشەسازی و کشتوکاڵی بووە.

? هەڵاوسانی ساڵانە لە عێراق دابەزیوە، گەشەی ئابووری بەتایبەتی لە کەرتی پیشەسازیدا بەدەست هاتووە و قەبارەی ئابووری نانەوتی و داهاتی ناباجی زیادیکردووە.

? وەبەرهێنانی بیانی لە پرۆژەی بەردەوامدا فراوان بووە بۆ ئاستێک کە لە ژینگەی وەبەرهێنانی عێراقدا نەبینراوە.

? ئاسایشی خۆراک لە گرنگترین بەروبوومەکاندا بەدیهاتووە، هەروەها بازنەی میکانیزەکردن لە کشتوکاڵ و تەکنیکەکانی ئاودێریدا فراوانتر بووە.

? پیشەسازی عێراقی سەرکەوتنی لە پیشەسازی دەرمانسازیدا تۆمار کردووە کە بەدڵنیاییەوە بەرەو خۆبژێوی و هەناردەکردن هەنگاو دەنێت.

? پیشەسازی پەیوەست بە ئاسایش و بەرگری دەبێت لە پێشەنگی کارەکاندا بێت.

? فراوانبوونی بازنەی ئەگەرەکان بەرامبەر ڕێکخراوە تیرۆریستییەکان، و فرەیی دەروازەی چالاکییەکانی تیرۆر و چالاکیەکانی دزەکردنی زانیاری، پێویستی بە هەوڵ و کارکردن هەیە بۆ بەهێزکردنی سیستەمی زانیارییەکانمان.

? دەبێت کارکردن تیشک بخاتە سەر بنیاتنانی توانا مرۆیی و تەکنەلۆژی و نەرمەکاڵاکان، بۆ ئەوەی لەگەڵ بەرزترین ئاستی هەڕەشە و مەترسیدا بگونجێت.

? دەبێت لە پێشەوەی بیرۆکەی تاوانکارانە بین بە هەنگاونان لە بواری ئاسایشی ئەلیکترۆنیدا.

? حکومەتەکەمان کار لەسەر بنیاتنان و ڕاهێنانی کارمەندی ئاسایش، تایبەت بە ئاسایشی زانیاری و پاراستنی ئەلیکترۆنی بۆ خزمەتگوزاری و دارایی دەکات.

? ئێمە کار لەسەر پلانێک دەکەین بۆ ڕووبەڕووبوونەوەی هەر هێرشێکی ئەلیکترۆنی چاوەڕوانکراو.

? بەردەوام دەبین لە کارکردن بۆ هاوبەشییەکی بەرهەمدار لەگەڵ کەرتی تایبەتی پسپۆڕ و یەکخستنی داتابەیسەکانی حکومەت و پاراستنیان لە هاککردن.

? حکومەت لە چوارچێوەی سیستەمێکی گشتگیردا کار دەکات، کە بە خێرایی بەرەو ئۆتۆماتیکیکردن و گۆڕینی دیجیتاڵی هەمەلایەنە لە کاری حکومەت هەنگاو دەنێت.

? باوەڕمان بە ئەگەری دامەزراندنی پیشەسازییەکی عێراقی جیاواز هەیە و بەردەوامین لە پلانەکانی دامەزراندنی پیشەسازییەکی یەکگرتوو کە پێداویستییە ناوخۆییەکان دابین بکات.