باسم عەوادی:حکومەت بەردەوامە لە دابینکردنی سەقامگیری لە وڵاتدا لەڕێگەی بڕیارەکانییەوە سەبارەت بە جێبەجێکردنی پڕۆژەکانی وەبەرهێنان

14:23 2024-05-11 28205 عێراق 0

2024-05-11

28205

وتەبێژی حکومەتی عێراق رایگەیاند، کارەکانی حکومەت بە ئاڕاستەیەک بوون کە پاڵپشتی سەرمایەی عێراق لەڕێگەی کەرتی تایبەت بکات لەگەڵ دابینکردنی پاڵپشتی دارایی لە وڵاتانی دەرەوە بۆ بەرەوپێشبردنی کەرتی وەبەرهێنان، بەردەوامیشە لە جێبەجێکردنیان. دەشڵێت، " لە بودجەی ساڵی ٢٠٢٣ـەوە زیاتر لە ٢٠ ترلیۆن دینار بۆ وەبەرهێنان لە عێراقدا خەرجکراوە".
باسم عەوادی وتەبێژی حکومەتی عێراق بە ئاژانسی هەواڵی عێراقی راگەیاند، حکومەت بەردەوامە لە دابینکردنی سەقامگیری لە وڵاتدا لەڕێگەی بڕیارەکانییەوە سەبارەت بە جێبەجێکردنی پڕۆژەکانی وەبەرهێنان و بەرەوپێشبردنی کەرتی وەبەرهێنان و کەرتی تایبەت.
ئاماژەی بەوەش کردووە، هەوڵدراوە هەمیشە سەرمایەی عێراق لە گرژی و ململانێکانی ناوچەکە بەدوور بگیرێت، هاوکات بەردەوامی وەبەرهێنان و پڕۆژەکانی کەرتی تایبەت یارمەتیدەر بووە لە گەڕانەوەی داهات و رەخساندنی هەلی کاری زیاتر بۆ هاوڵاتیان.

باسی لەوەش کردووە، مانگی رابردوو حکومەتی عێراق بڕیارێکی نوێی دا و لەگەڵ وەبەرهێنەران لە خاکی عێراقدا رێککەوتن لەسەر ئەوەی بۆ ماوەی پێنج ساڵ بەرهەمەکانیان لێ بکڕێت و ئەوەش دەبێتە گرەنتی بۆ وەبەرهێنەران و ساغکردنەوەی بەرهەمەکانیان.

ئەوەشی خستووەتە روو، جگە لەوەش ئاسانکاری بۆ وەبەرهێنەرانی کەرتی تایبەت کراوە لە پڕۆسەی هاوردەکردنی هەر شتومەک و کاڵایەک لە هەر وڵاتێکەوە بیانەوێت بەو مەرجەی هەماهەنگیان لەگەڵ وەزارەت و دامودەزگا پەیوەندیدارەکان هەبێت.

وتیشی، حکومەت هەموو رێوشوێنێکی پێویست بۆ پاڵپشتیکردنی وەبەرهێنانی ناوخۆیی و دەرەکی دەگرێتە بەر، لە رێگەی پاڵپشتیکردنی کەرتی تایبەت و گفتوگۆکردن لەگەڵ کۆمپانیا گەورە نێودەوڵەتییەکان بە مەبەستی هاتنیان بۆ عێراق و وەبەرهێنان تێیدا.