شاناز ئیبراهیم ئەحمەد، خانمی یەکەمیی عێراق سەبارت بە گیان لەدەستدانی هاوڵاتییەکی خەڵکی شێلادزێ لەئەنجامی بۆردوومانی فڕۆکەکانی تورکیا لە تۆڕی کۆمەڵایەتی ئێکس نوسیویەتی، بەردەوام ڕاپۆرتی ترسناکمان پێدەگات سەبارەت بە پەلاماردانی تورکیا بۆ سەر خاک و سەروەری عێراق، ڕۆژانە ڤیدیۆی ڕاستەوخۆی جموجۆڵی سەربازانی تورک و هێرشەکانی سەر گوندە کوردنشین و ئاشوورییەکان دەبینین، بەگوێرەی زانیارییە باوەڕپێکراوەکانی ڕێکخراوێکی چاودێری جەنگ و مافەکانی مرۆڤی ئەمریکا، سوپای تورکیا 15 کیلۆمەتر پێشڕەوی کردووە بۆ ناو خاکی هەرێمی کوردستان و 238 بۆردوومانی ئەنجامداوە کە زۆربەیان لە دهۆک بووە.
شاناز ئیبراهیم ئەحمەد دەشڵێت: هاوڵاتیانی بێتاوان ناچار دەبن ماڵ و حاڵی خۆیان بەجێبهێڵن و لە کەمپەکانی ئاوارەکان پەنا ببەن، لەسەرتای ئەم هێرش و لەشکرکێشی نوێیەی تورکیا، بەلایەنی کەمەوە 602 گوند لەژێر هەڕەشەدا بوونە، هەروەها هێرشەکان قوتابخانەیەک و کڵێسایەکی ئاشووری وێران کردووە، بۆمان دەرکەوتووە کە 20 هەزار دۆنم زەوی کشتوکاڵی بەهۆی بۆردوومانەکانی تورکیاوە سوتاوە، ڕاپۆرتەکان دەڵێن تەنها لە یەک گوند لە سەدا 55ـی زەوی کشتوکاڵی سووتاوە.

زانیاری زیاتر...
بەیانی ئەمڕۆ بەهۆی بەردەوامی بۆردوومانی فڕۆکەکانی سوپای توركیا، هاوڵاتییه‌كی ناحیه‌ی شلادزێ له‌ ناوچەی نزارێ شه‌هیدبوو و كه‌سێكی دیكه‌ش برینداربوو.
سەرلەبەیانی ئەمڕۆ پێنجشەممە 18ـی تەمموزی 2024، بەهۆی بۆردوومانی فڕۆکە جەنگییەکانی تورکیا، هاوڵاتییەکی مەدەنی بە ناوی "عوسمان مروانسی" تەمەن 32 ساڵ، كە دانیشتووی ناحیەی شێلادزێیە لە سنووری پارێزگای دهۆک گیانی لەدەستداوە و کەسێکی تر بە سەختی برینداربووە.
شایەنی باسە، سەرەڕای بەرزبونەوەی قوربانییەکان بە بەردەوامی، تاکز ئێستا لایەنەکانی دەسەڵات و حکومەتی هەرێم بێ دەنگن لەبەرامبەر دەستدرێژی و لەشکرکێشی سوپای تورکیا لە خاکی هەرێمی کوردستان، کە بووە هۆی ئاوارەبوونی دەیان کوند و باژێر هەروەها کەوتنەوەی دەیان قوربانی لە هاوڵاتیانی هەرێمی کوردستان.

چەندین ساڵە سوپای تورکیا لە خاکی هەرێمی کوردستان بوونی هەیە و زیاتر لە چل بارەگای سەربازی بۆخۆی و هێزەکانی لە پارێزگای دهۆک و ڕۆژهەڵاتی هەولێر دروستکردووە بە بیانوی بوونی پارتی کرێکارانی کوردستان، لەکاتێکدا هێرشە فڕۆکەوانیەکانی تورکیا بوونە هۆی کوژرانی زیاتر لە 130 هاوڵاتی سڤیلی هەرێمی کوردستان لەماوەی هەشت ساڵی ڕابردوودا و لەسەرتای ئەمساڵ بەگوێرەی ڕێکخراوەی CPT ئەمریکی، دە هاوڵاتی مەدەنی لە هەرێمی کوردستان بەهۆی هێرشەکانی تورکیا گیانیان لەدەستداوە کە ئەمانە تەنها ژمارەی ڕاگەیندراوەکانە، لەبەرامبەردا چەندین هاوڵاتی تری مەدەنی لە شەنگال لە ڕۆژئاوای پارێزگای نەینەوا کراونەتە ئامانج.