وەزارەتی دەرەوەی ئەمەریکا پێشێلکاری مافی مرۆڤ و ئازادی لە هەرێمی کوردستان ئاشکرا دەکات

01:17 2024-05-02 34400 كوردستان 0

2024-05-02

34400

وەزارەتی دەرەوەی ئەمەریکا لە راپۆرتی ساڵانەی خۆیدا کە دووشەممە (22ـی نیسانی 2024) بڵاوکرایەوە، رەخنەی توند لە دۆخی مافی مرۆڤ و ئازادی رۆژنامەگەری و بیروڕا لە هەرێمی کوردستان دەگرێت و ڕایگەیاند، "دۆخی ئازادییە بنەڕەتی و مەدەنیەكان لە هەرێمی كوردستان و عێراق زۆر خراپتربوون".
لەو راپۆرتەی وەزارەتی دەرەوەدا هاتووە، "بەراورد بە ساڵانی رابردوو پێشێلكارییەكانی مافی مرۆڤ بەرامبەر بە خەڵكی عێراق و هەرێم زیاتر بووە و لە هەندێک حاڵەتدا حكومەتی عێراق سزای گومانلێکراوانی داعشی بەپێی یاسای تیرۆر داوە".
وەزارەتی دەرەوەی ئەمەریكا ڕاشیگەیاندووە، "بەهۆی سنوردارکردنی ئازادییە بنەڕەتییەکان و فەزای مەدەنی لە ساڵی رابردوودا، دۆخی مافی مرۆڤ لە عێراق و هەرێمی کوردستان خراپتر بووە"، هاتووش، "بەشێك لەو پێشێلكارییانە لە ئەنجامی هێرشەكانی داعش و شەڕی لەگەڵ هێزە ئەمنییەکانی عێراق لە ناوچە دوورەکان، هەروەها ئۆپەراسیۆنە سەربازییەکانی تورکیا دژی پەكەكە لە هەرێمی كوردستان، بوونی میلیشیاکان کە بە تەواوی لە ژێر کۆنترۆڵی حکومەتدا نین و هاوپەیمانی ئێرانن دروستبوون".
وەزارەتی دەرەوە ئاماژە بۆ ئەوەش دەکات کە بەشێكی دیكە لە سەرپێچییەكان كە دژی مافەكانی مرۆڤ و خەڵكی عێراق و هەرێم ئەنجام دەدرێت و لەلایەن راپۆرتە باوەڕ پێكراوەكانەوە پشتڕاستكراونەتەوە، خۆیان لە خۆكوشتن، کوشتن و ئەشكەنجەی دەرەوەی یاسا، رفاندن و بێسەروشوێن كردن، سزادانی دڕندانەوە و نامرۆڤانە دەبیننەوە.
لەبارەی كوشتنی ئافرەتان بە پاساوی شەرەفەوە، راپۆرتەکەی وەزارەتی دەرەوەی ئەمەریکا ئاماژەی بۆ ئەوەشكردوە، "سزای ئەندامانی خێزان دەدرێت بەهۆی ئەوەی گوایە تاوانێكیان ئەنجام داوە و نهێنییەكانی خێزانیان نەپاراستووە".
لە راپۆرتەكەی وەزارەتی دەرەوەی ئەمەریكا راشگەیندرا، "كۆتوبەندكردن و سنووردارکردنی ئازادی رادەربڕین و كاری میدیایی لە عێراق و هەرێمی كوردستان زیاتر بووە، ئێستا پیشەی رۆژنامەوانی مەترسییان لەسەر ژیانی رۆژنامەنووسان دروستكردوە و بەوهۆیەشەوە هەڕەشەیان لێدەكرێت و توندروتیژییان بەرامبەر ئەنجام بدرێت".
ئەوەش خراوەتەڕوو، "زیندان و ناوەندەکانی چاکسازیی لە دۆخی خراپدان و رێژەی قەرەباڵغی گەیشتووتە 157% و زیندانیانی نێوجەوانان لەگەڵ گەوران دانراون".