وادەی کۆتایی هاتنی شەپۆلی باران بارین لە کوردستان ئاشکرا کرا

15:52 2024-04-30 46854 كوردستان 0

2024-04-30

46854

وتەبێژی وەزارەتی گواستنەوە و گەیاندنی هەرێمی کوردستان دەڵێت، شەپۆلی بارانبارین تا دووشەممەی داهاتوو بەردەوام دەبێت. دەشڵێت، بارانە بەخوڕەکە ڕۆژانی پێنجشەممە و هەیینی دەبارێت.
ئەمڕۆ سێشەممە، دیلان ڕەشاد، وتەبێژی وەزارەتی گواستنەوە و گەیاندنی حکوومەتی هەرێمی کوردستان لە کۆنفڕانسێکی ڕۆژنامەوانیدا ڕایگەیاند، "ئەو شەپۆلە بارانبارینەی هەرێمی کوردستانی گرتووەتەوە، تا ڕۆژی دووشەممەی داهاتوو، 06-05-2024 بەردەوام دەبێت".
وتەبێژی وەزارەتی گواستنەوە و گەیاندن لە بەشێکی دیکەی قسەکانیدا ئاماژەی بەوەش کرد، کاریگەریی ئەو شەپۆلەی باران بارین، لەئەمڕۆ سێشەممەوە "بە لاوازی دەست پێ دەکات و ڕۆژی دووشەممەی داهاتووش، 06-05-2024، بە لاوازی کۆتایی دێت".
ئاماژەی بەوەشدا، بارانبارینە بەخوڕ و بەلێزمەکە، لە هەرێمی کوردستان دەکەوێتە ڕۆژانی پێنجشەممە و هەیینی داهاتوو، 02 بۆ 03-05-2024. وتیشی، "بەهۆی بارانەوە، کاریگەریی ئەو خۆڵبارینەی هەرێمی کوردستانی گرتبووەوە، کەم بووەتەوە".
بە گوتەی گوتەبێژی وەزارەتی گواستنەوە و گەیاندن، "پێشبینی کراوە، لە سنووری هەردوو پارێزگای هەڵەبجە و کەرکووک و ئیدارەی سەربەخۆی ڕاپەرین، ئاستی بارانبارین بەراورد بە شارەکانی دیکەی هەرێمی کوردستان زیاتر بێت و مەترسی هەڵسانی لافاو لەو شوێنانە هەیە".
بەرزترین پلەکانی گەرمای پێشبینیکراو بە پلەی سیلیزی:
هەولێر: 25
سلێمانی: 24
دهۆک: 25
زاخۆ: 25
هەڵەبجە: 25
کەرکوک: 27
سۆران: 23
حاجی ئۆمەران: 15
گەرمیان: 29