نێچێرڤان بارزانی سەرۆکی هەرێمی کوردستان رایگەیاند، هەرێمی کوردستان بە دۆخێکی هەستیاریدا تێپەڕ دەبێت، داوا لە لایەنە سیاسییەکان دەکات بە لێکتێگەیشتن و گفتوگۆ چارەسەری کێشەکان بکەن، مێژوش ئەوەی سەلماندوە، ئەگەر مافی کوردستان پێشێلبکرێت، عێراق سەقامگیری و خۆشی بە خۆیەوە نابینێت.

نێچیرڤان بارزانی سەرۆکی هەرێمی کوردستان لە پەیامێکدا رایگەیاند، "نه‌ورۆز، جه‌ژنى نه‌ته‌وه‌یى و سه‌رى ساڵى تازه‌ى كوردى، به‌ گه‌رمى له‌ خێزان و كه‌سوكارى سه‌ربه‌رزى شه‌هیدان، له‌ هه‌ر كوردێك و هه‌مو پێكهاته‌كانى گه‌لى كوردستان له‌ هه‌ركوێ بن‌، پیرۆز ده‌كه‌م، هیواى ساڵێكى تازه‌ى پڕ له‌ خۆشى و ته‌ندروستیى باش، ئارامى و ئاسوده‌یى و سه‌ركه‌وتن بۆ هه‌موان ده‌خوازم."
ئاماژەی بەوەشکردوە، ئه‌مڕۆ كه‌ به‌ دۆخێكى هه‌ستیاردا تێده‌په‌ڕین، داوا له‌ لایه‌نه‌ سیاسییه‌كانى كوردستان ده‌كه‌م، به‌ گیانى به‌رپرسیاریه‌تیى نیشتمانى و به‌ لێكگه‌یشتن، ناكۆكییه‌كان چاره‌سه‌ر بكه‌ن تا بتوانین پێكه‌وه‌ ڕوبه‌ڕوى هه‌ڕه‌شه‌ و ئاڵنگارییه‌كان ببینه‌وه‌ و فیدراڵى و قه‌واره‌ى سیاسى و ماف و ده‌سكه‌وته‌ ده‌ستورییه‌كانمان بپارێزین. هه‌موان له‌ هه‌مان كه‌شتیداین و ئه‌گه‌ر هاوهه‌ڵوێست و یه‌كڕیز باین، دۆخه‌كه‌ به‌ ئه‌مڕۆ نه‌ده‌گه‌یشت."
ئەوەشخراوەتەڕو، گه‌لى كوردستان هه‌رگیز واز له‌ ئازادى و مافه‌كانى ناهێنێت،مێژو سه‌لماندویه‌تى تا نكۆڵى له‌ كورد و كوردستان بكرێت و مافه‌كانى پێشێل بكرێت، عێراق خۆشى و سه‌قامگیرى به‌خۆیه‌وه‌ نابینێت، با هه‌مومان له‌ عێراق له‌ هه‌ڵه‌كانمانه‌وه‌ فێر ببین، جێبه‌جێنه‌كردنى ده‌ستور و فیدراڵى و ڕێككه‌وتنه‌ سیاسییه‌كان، ده‌ستیده‌ستیكردن به‌ شایسته‌كان و هه‌وڵى بچوككردنه‌وه‌ى هه‌رێمى كوردستان و پێشێلكردنى مافه‌ ده‌ستورییه‌كانى، جگه‌ له‌ زیان هیچ سودێكى بۆ عێراق نابێت."
نێچیرڤان بارزانی باسی لەوەشکردوە، له‌م جه‌ژنه‌ پیرۆزه‌دا جه‌خت له‌ بڕوا و سیاسه‌تى نه‌گۆڕمان ده‌كه‌ینه‌وه‌ كه‌ هه‌رێمى كوردستان وه‌ك هه‌میشه‌ له‌ ناوچه‌كه‌ فاكته‌رى ئارامى و سه‌قامگیرى ده‌بێت، خوازیارى په‌یوه‌ندیى باش و دۆستانه‌ و دراوسێیه‌تیى باشه‌ له‌سه‌ر بنه‌ماى ڕێز و به‌رژه‌وه‌ندیى هاوبه‌ش، هه‌ر له‌م بۆنه‌یه‌دا پیرۆزبایى له‌و گه‌لانه‌ش ده‌كه‌ین كه‌ جه‌ژنى نه‌ورۆز ده‌گێڕن و ئه‌م یاده‌ ده‌كه‌نه‌وه‌.
دەشڵێت، "سوپاسى تێگه‌یشتن و گیانى به‌رپرسیاریه‌تى و خۆڕاگریى فه‌رمانبه‌ران و خه‌ڵكى كوردستان ده‌كه‌م، له‌ نزیكه‌وه‌ ئاگادارى بارى ژیان و گوزه‌رانیانین، چاره‌سه‌ركردنى ئه‌م دۆخه‌، كارى له‌پێشینه‌ى هه‌مومان له‌ هه‌مو دامه‌زراوه‌كانى هه‌رێمى كوردستانه‌، دڵنیایان ده‌كه‌مه‌وه‌ كه‌ ئه‌م سه‌ختیانه‌ش تێده‌په‌ڕن و ده‌بنه‌ ڕابردو، به‌ ئومێده‌وه‌ به‌ره‌و ژیان و داهاتویه‌كى باشتر هه‌نگاو ده‌نێین و كوردستان بۆ هه‌میشه‌ وڵاتى پێكه‌وه‌ژیان و لێبورده‌یى و فره‌یى ده‌مێنێته‌وه‌."