قوباد تاڵەبانی: نابێت هەڵبژاردن دوابکەوێت

13:36 2024-02-28 19189 كوردستان 0

2024-02-28

19189

قوباد تاڵەبانی، جێگری سەرۆک وەزیرانی هەرێمی کوردستان سەردانی کونسوڵخانەی ئیماراتی کرد و لەلایەن ئەحمەد ئیبراهیم ئەلزاهیری، کونسوڵی گشتیی ئیماراتەوە پێشوازی لێکرا و لە کۆبوونەوەی نێوانیاندا چەند پرسێکی جێی بایەخی هەردوولا تاوتوێ کران.
بەگوێرەی راگەیەندراوێکی نوسینگەی راگەیاندنی جێگری سەرۆکی حکومەتی هەرێم لە کۆبوونەوەکەدا کە رۆژی چوارشەمە ( ٢٨ی شوباتی ٢٠٢٤) بەڕێوەچوو، هەردوولا بە گرنگییەوە باسیان لە پەرەپێدانی پەیوەندییەکانی نێوان ئیمارات و هەرێمی کوردستان لە بوارە جیاوازەکاندا کرد. قوباد تاڵەبانی ئاماژەی بە ئەزمونی سەرکەوتووی گەشەسەندنی ئیمارات کرد و خواستی هەرێمی کوردستانی دەربڕی بۆ سودوەرگرتن لە ئەزمونی گەشەسەندنی ئەو وڵاتە لە بوارە جیاوازەکاندا.

لە بەشێکی دیکەی کۆبوونەوەکەدا، باس لە چۆنییەتی کاری پێکەوەیی کرا بۆ هاندانی وەبەرهێنەرانی ئیماراتی تا ڕوو لە هەرێمی کوردستان بکەن. لەمبارەیەوە جێگری سەرۆک وەزیران رایگەیاند: "حکومەتی هەرێمی کوردستان ئامادەیە هەموو جۆرە کارئاسانییەک پێشکەشی وەبەرهێنەرانی ئیماراتی بکات بە تایبەتیش لە بوارەکانی پیشەسازی و کشتوکاڵ و گەشتوگوزاردا".

لە تەوەرەێکی دیکەدا گفتوگۆکرا لەبارەی پەیوەندییەکانی نێوان هەرێم و بەغدا و دواین پێشهاتەکان تاوتوێ کران. لەمبارەیەوە قوباد تاڵەبانی ئاماژەی بەوەدا هەوڵەکانمان بەو ئاراستەیەدان کە هەموو کێشەکانی نێوان هەرێم و بەغدا بەشێوەیەکی بنەڕەتی بەپێی دەستور چارەسەر بکرێن.

سەبارەت بە هەڵبژاردنەکانی داهاتووی پەرلەمانی کوردستانیش کە تەوەرێکی دیکەی کۆبوونەوەکە بوو، جێگری سەرۆک وەزیران رایگەیاند: "نابێت لەوە زیاتر هەڵبژاردن دوا بکەوێت و پێویستە لەو وادەیەی کە بڕیارە بەم نزیکانە لەلایەن سەرۆکایەتی هەرێمەوە دیاری بکرێت، هەڵبژاردنەکان بە شێوەیەکی پاک و بێگەرد و دادپەروەرانە بەڕێوەبچێت".