سەرۆک کۆمار پێشوازی لە سەرۆکی ئەنجومەنی باڵای دادوەری دەکات

22:51 2023-12-07 32073 عێراق 0

2023-12-07

32073

سەرۆک کۆمار دکتۆر لەتیف جەمال ڕەشید، ئەمڕۆ پێنجشەممە 2023-12-7 لە کۆشکی بەغداد، پێشوازیکرد لە دادوەر فایەق زەیدان، سەرۆکی ئەنجومەنی باڵای دادوەری.
بەگوێرەی راگەیەندراوێکی سەرۆکایەتی کۆمار لەدیدارەکەدا تاوتوێی بارودۆخی گشتی وڵات و چۆنیەتی بەرجەستەکردنی دادپەروەری و سەربەخۆیی دادوەری و پتەوکردنی بنەمای سەروەری یاسا کرا و جەختیان لە پێویستی هەماهەنگی و بەهێزکردنی یەکخستنی نێوان دەسەڵاتە دەستوورییەکان کردەوە.
سەرۆک کۆمار دوپاتی لە گرنگی ڕۆڵی دەسەڵاتەکانی دادوەری کردەوە لە پاراستنی هەڵبژاردنەکانی داهاتووی ئەنجومەنی پارێزگاکان بە شێوەیەک کە ڕێوشوێنی پاکی و بێگەردی هەڵبژاردنەکان دەستەبەربکات.
هاوکات سەرۆک کۆمار، ئاماژەی بە هەماهەنگییەکی بەرهەمدار کرد لە نێوان سەرۆکایەتی کۆمار و ئەنجومەنی باڵای دادوەری بەتایبەتی لە بواری داڕشتنی یاساکانی پەیوەست بە پێداویستییەکانی خەڵک و بەردەوامبوون لە بەرەنگاربوونەوەی گەندەڵی و کەمکردنەوەی پێشێلکارییەکان لەسەر بودجەی گشتی.
هەر لە دیدارەکەدا پێداچوونەوەیان بە ئەنجامەکانی سەردانەکەی سەرۆک کۆمار بۆ ئیمارات و بەشداریکردنی لە کۆنفرانسی لوتکەی نەتەوە یەکگرتووەکان بۆ کەشوهەوا (COP28) و لوتکەی کۆمەڵەی( +G77 (China لە دوبەی کرد.
لەلای خۆیەوە دادوەر فایق زەیدان، جەختی کردەوە لەسەر پێویستی هەماهەنگی و ڕاوێژکردن لە نێوان سەرۆکایەتی کۆمار و ئەنجومەنی باڵای دادوەریدا سەبارەت بە پەسەندکردنی ئەو یاسایانەی کە خزمەتی خەڵک و بەرژەوەندییەکانیان دەکەن و کۆمەڵگەکەمان لە تاوان و دیاردە نامۆکان دەپارێزن.
هەروەها سەرۆکی ئەنجومەنی باڵای دادوەری ستایشی سەردانەکەی سەرۆک کۆمار بۆ ئیمارات و بەشداریکردنی لە کۆنفرانسی لوتکەی نەتەوە یەکگرتووەکان بۆ کەشوهەوا کرد ، لە خولی بیست و هەشتەمیندا، و داوای بەڕێزیان بۆ دامەزراندنی کۆمەڵەیەکی هەرێمی کە هەشت وڵاتی کەناراوەکانی کەنداو لەخۆ بگرێت بۆ ڕووبەڕووبوونەوەی مەترسییەکانی گۆڕانی کەشوهەوا.