سەرۆک کۆمار پێشوازی لەسەرۆکی کۆمەڵی دادگەری کوردستان دەکات

16:55 2023-10-22 39262 عێراق 0

2023-10-22

39262

سەرۆک کۆمار، دکتۆر لەتیف جەمال ڕەشید، ئەمڕۆ یەکشەممە لە کۆشکی بەغداد، پێشوازیکرد لە سەرۆکی کۆمەڵی دادگەری کوردستان ، عەلی باپیر و شاندی یاوەری .
نوسینگەی راگەیاندنی سەرۆکایەتی کۆمار لەراگەیەندراوێکدا رایگەیاند:"لەمیانی دیدارەکەدا تاوتوێی بارودۆخی گشتی وڵات و پێشهاتەکانی کرا، کە تیایدا سەرۆک کۆمار جەختی لە پێویستی یەکخستنی هەوڵی هەموو هێزە سیاسییەکان کردەوە بۆ پتەوکردنی ئاسایش و سەقامگیری و باشترکردنی ژیان و بارودۆخی خزمەتگوزاری هاوڵاتیان".
سەرۆک کۆمار ئاماژەی بە گرنگی بەردەوامی دیالۆگ لە نێوان حکومەتی فیدراڵی و هەرێمی کوردستان کرد بۆ گەیشتن بە چارەسەری ڕیشەیی بۆ کێشە هەڵپەسێردراوەکان بە پێی دەستوور و یاسا و بە شێوەیەک کە مافەکانی هەموو هاوڵاتیان مسۆگەر بکات و جەختیشی لەوە کردەوە کە پەیوەندی نێوان حکومەتی فیدراڵی و هەرێمی کوردستان پەیوەندییەکی بەهێز و سەردانی شاندەکانی هەردولا بەردەوامە و ویستێکی باشیش بۆ چارەسەرکردنی ئەو پرسانە هەیە.
هەروەها بەڕێزیان، ئاماژەی بە پێشکەوتنە ئەرێنییەکان کرد کە حکومەت گرنگییەکی گەورەی بە سەقامگیری ئاسایش داوە، جگە لە دابینکردنی خزمەتگوزاری، بەردەوامبوون لە پرۆسەی چاکسازی، ڕێگریکردن لە گەندەڵی، چاککردنەوەی ژێرخانی ئابوری و دەستپێکردنی پرۆژە ستراتیژییەکان، هاوکات ئاماژەی بەوەشکرد کە عێراق بەهۆی جەنگ و توندوتیژی و تیرۆر و دیکتاتۆرییەوە زۆر ئازاری چێشێوە، کە ڕەنگدانەوەی نەرێنی لەسەر زۆرێک لە بوارەکانی ئابووری و خزمەتگوزاری و ژیانی ژینگەیی هەبووە.
سەرۆک کۆمار ئاماژەی بەو پڕۆژە یاسایانە کرد کە لەلایەن سەرۆکایەتی کۆمارەوە پێشکەش بە ئەنجومەنی نوێنەران کراون بۆ دەنگدان لەسەریان، وەک پڕۆژە یاسای ئەنجومەنی باڵای ئاو، پڕۆژە یاسای هەموارکردنەوەی بڕیارەکانی ئەنجومەنی سەرکردایەتی شۆڕشی هەڵوەشاوە لەبارەی خانووبەرە، پڕۆژە یاسای دەستەی باڵای بەهێزکردنی ژنان، جگە لە پڕۆژە یاسای هەموارکردنی یاسای ماددەی هۆشبەر و ماددە دەروونییەکان و پڕۆژە یاسای گێڕانەوەی سامانی گەندڵی .
سەرۆکی کۆمار باسیشی لە قەیرانی ئاو و کاریگەرییەکانی لەسەر عێراق کرد و ئاماژەی بە نەبوونی ڕێککەوتنی نێودەوڵەتی یان دووقۆڵی نێوان وڵاتان کرد کە مافی هەمووان مسۆگەری دەکات لە پشکی ئاوی دادپەروەرانە، جگە لە نوێ نەکردنەوەی سیستەمی ئاودێری.
لە لای خۆیەوە، عەلی باپیر خۆشحاڵی خۆی دەربڕی بۆ دیداری لەگەڵ سەرۆک کۆمار و جەختی لە گرنگی بەرجەستەکردنی ئاسایش و سەقامگیری و دەستەبەرکردنی مافەکانی هاوڵاتیان و بەدیهێنانی خواستەکانیانی کردەوە.