كۆبونه‌وه‌ی مه‌زڵوم عه‌بدی و وه‌زیری ده‌ره‌وه‌ی فه‌ره‌نسا: مافه‌كانی كورد له‌ سوریا پارێزراو بن

09:48 2026-02-06 29876 كوردستان 0

2026-02-06

29876

مه‌زڵوم عه‌بدی، فه‌رمانده‌ی گشتی هه‌سه‌ده‌ رایگه‌یاند، له‌ كۆبونه‌وه‌یاندا له‌گه‌ڵ ژان نوێل بارۆ، وه‌زیری ده‌ره‌وه‌ی فه‌ره‌نسا گفتوگۆیان له‌باره‌ی چه‌ند پرسێك كردوه‌ له‌نێویاندا پاراستنی تایبه‌تمه‌ندی ناوچه‌ كوردییه‌كان و پاراستنی مافه‌كانی كورد له‌ سوریا.

مه‌زڵوم عه‌بدی، فه‌رمانده‌ی گشتی هه‌سه‌ده‌ و ژان نوێل بارۆ، وه‌زیری ده‌ره‌وه‌ی فه‌ره‌نسا له‌ هه‌ولێر كۆبونه‌وه‌.

مه‌زڵوم عه‌بدی له‌ راگه‌یه‌ندراوێكدا وتویه‌تی، له‌ كۆبونه‌وه‌كه‌دا گفتوگۆیان له‌سه‌ر ورده‌كارییه‌كانی جێبه‌جێكردنی رێككه‌وتنه‌كه‌ی 29ی كانونی دوه‌م كردوه‌ له‌گه‌ڵ به‌رده‌وامبون له‌ روبه‌ڕوبونه‌وه‌ی داعش و چۆنیه‌تی پاراستنی زیندانه‌كانی داعش و خانه‌واده‌كانیان.

هه‌روه‌ك مه‌زڵوم عه‌بدی ئاماژه‌ی پێداوه‌، له‌به‌شێكی دیكه‌ی كۆبونه‌وه‌كه‌دا گفتوگۆیان له‌باره‌ی پاراستنی تایبه‌تمه‌ندی ناوچه‌ كوردییه‌كان و پاراستنی مافه‌كانی كورد له‌ سوریا كردوه‌.

تێكه‌ڵكردنی هێزه‌ سه‌ربازی و ئه‌منییه‌كان به‌هه‌مو ورده‌كارییه‌كانیانه‌وه‌، له‌نێویشیاندا یه‌كینه‌كانی پاراستنی ژنان-یه‌په‌ژه‌، یه‌كێكی دیكه‌ بوه‌ له‌و پرسانه‌ی كه‌ مه‌زڵوم عه‌بدی و وه‌زیره‌ فه‌ره‌نسییه‌كه‌ گفتوگۆیان له‌باره‌وه‌ كردوه‌.

فه‌رمانده‌ی گشتی هه‌سه‌ده‌ وتوشیه‌تی، ژان نوێل بارۆ سه‌رنجی له‌سه‌ر گرنگیی جێبه‌جێكردنی ته‌واوه‌تی رێككه‌وتنه‌كه‌ بوه‌و پشتیوانی وڵاته‌كه‌ی بۆ ئه‌م قۆناغه‌ ده‌ربڕیوه‌.