لە ساڵیادی دامەزراندنی... سەرۆک کۆمار ستایشی قوربانیدانی سوپای عێراق دەکات

21:18 2026-01-05 13980 عێراق 0

2026-01-05

13980

ئەمڕۆ دووشەممە، سەرۆک کۆمار عەبدوللەتیف جەمال ڕەشید، بەبۆنەی 105ـەمین ساڵیادی دامەزراندنی سوپای عێراقەوە پیرۆزبایی کرد، هاوکات جەختی لەسەر پێویستی پاڵپشتیکردنی دامەزراوەی سەربازی و بەهێزکردنی تواناکانی لە ڕووی پیشەیی و تەکنیکی و چەسپاندنی بیروباوەڕی نیشتمانیی سوپا کردەوە، بە شێوەیەک کە لەگەڵ ڕۆڵە دەستوورییەکەی لە پاراستنی عێراق و سەروەرییەکەیدا بگونجێت.
سەرۆک کۆمار لە ڕاگەیەندراوێکدا کە دەست ئاژانسی هەواڵی موتەڵع کەوتووە، ڕایگەیاند: "بەبۆنەی 105ـەمین ساڵیادی دامەزراندنی سوپای عێراقەوە، مێژووی ئەم سوپایە لە بەرەنگاربوونەوەی تێرۆر و پاراستنی ئاسایشی هاووڵاتییان بەرز دەنرخێنین، کە هەمیشە پشتیوانێکی ئەمینداری گەلی عێراق و قەڵغانێکی پتەوی نیشتمان بووە".
ئاماژەی بەوەشکرد: "سوپای عێراق لەگەڵ تەواوی هێزە ئەمنییەکانی ترمان لە پۆلیس و حەشدی شەعبی و پێشمەرگە، قوربانیی گەورەیان لە پێناو بەرگری لە خاکی عێراق و کەرامەتی ڕۆڵەکانی پێشکەش کردووە، و داستانی قارەمانانەیان لە ڕووبەڕووبوونەوەی تێرۆر و توندڕەویدا تۆمار کردووە، و بەشداربوون لە بەدیهێنانی سەرکەوتن و پاراستنی ئاسایش و سەقامگیری، و پابەندیی خۆیان بە ئەرکی نیشتمانی دووپات کردەوە".
لە درێژەی قسەکانیدا وتی: "لەم بۆنەیەدا سڵاو بۆ ڕۆڵە قارەمانەکانی سوپاکەمان دەنێرین، و بە شکۆوە یادی شەهیدە نەمامەکانی عێراق دەکەینەوە کە گیانی خۆیان فیدای نیشتمان کرد، و پێزانینی زۆرمان بۆ خێزانە سەربەرزەکانیان هەیە"، هەروەها دەستخۆشی لە هەوڵی برینداران و هەموو ئەو کەسانە کرد کە تا ئێستاش لە سەنگەرەکانی شەرەفدا ماونەتەوە بۆ بەرگری لە ئاسایش و یەکپارچەیی عێراق.
جەختیشی لەسەر "پێویستی پاڵپشتیکردنی دامەزراوەی سەربازی و گەشەپێدانی تواناکانی لە ڕووی پیشەیی و تەکنیکی، و چەسپاندنی دیسپلینی نیشتمانی کردەوە، بەو جۆرەی لەگەڵ ڕۆڵە دەستوورییەکەی بۆ پاراستنی عێراق و سەروەرییەکەی بگونجێت".