هەولێر...سەرۆکایەتی شارەوانی چەند بڕیارێکی سەبارەت بە رێکخستنەوەی ناوشار بڵاوکردەوە

22:36 2025-08-23 26516 كوردستان 0

2025-08-23

26516

ئەمڕۆ شەممە، سەرۆکایەتی شارەوانی هەولێر چەند بڕیارێکی سەبارەت بە رێکخستنەوەی ناوشار و فەرمانگە حکومی و حزبی و دامەزراوە ئەهلییەکان لە سنوورەکەیان بڵاوکردەوە.
‏
‏ شارەوانی هەولێر لە راگەیەندراوێکدا بڵاویکردەوە "بەدواداچوون بۆ کۆن بوون یان دڕانی ئاڵای کوردستان لەسەر هەموو دامودەزگا حزبی و حکومی و شوێنە گشتیی و ئەهلییەکان دەکەن".
‏
‏ئاماژەی بۆ ئەوەشکرد "بڕیاریانداوە بە چڕکردنەوەی هەوڵەکانیان لە بوارەکانی ":
‏
‏1-بایەخدان بە گەیاندنی رۆژە خزمەتگوزاریەکان و کارەکانی قیرتاوکردن و چاککردنەوەی شەقام.
‏
‏2-رێکخستنەوەو چاککردنەوەی شەقام، یاخود لادانی تاسە و بەدواداچوون بۆ فلکەکانی سوڕانەوە (یوتێرن) لە پێناو کەمکردنەوەی ئاستەنگی هاتوچۆ.
‏
‏3-بەدواداچوونی بازاڕ و شوێنە گشتییەکان و نەهێشتنی زێدەڕۆیی لەسەر موڵکی گشتیی
‏
‏4-راگرتنی پاکوخاوێنی شار و بەردەوامی کۆکردنەوەی زبڵ و خاشاک لەلایەن تیمەکانی ژینگەپارێزی.
‏
‏5- بەدواداچوون بۆ کۆن بوون یان دڕانی ئاڵای پیرۆزی کوردستان لەسەر گشت دام و دەزگا حزبی و حکومی و شوێنە گشتیی و ئەهلییەکان پێویستە ئاگادار بکرێنەوەو بگۆڕدرێت.
‏
‏6-فراوانترکردنی هەڵمەتەکانی رواندنی دار و زیادکردنی رێژەی سەوزایی.
‏
‏7-گەڕان و چاودێری کردن لە گەڕەک و شوێنە گشتیەکان، بۆ هەر کەسێک کە سەرپێچی بە فیڕۆدانی ئاو بکات.
‏
‏8- زیادکردنی تیمێکی دیکە بۆ گرتنی سەگە بێلانەکان لە ناو پارک و شەقام و کۆڵانەکانی شاری هەولێر.
‏
‏9-بایەخ دان بە رێگا سەرەکی و دەروازەکانی هاتنە ناوەوەی شار لەڕووی ژینگە و خاوێنی شەقامەکان.
‏