سودانی جەختدەکاتەوە لەپاراستنی کرێکارانی بیانی و پەرەپێدانی پەیوەندییەکان لەگەڵ پاکستان ‏

22:06 2025-08-23 37716 عێراق 0

2025-08-23

37716

ئەمڕۆ شەممە ،محەمەد شیاع سودانی سەرۆكی ئەنجومەنی وەزیران جەختیکردەوە لەپاراستنی کرێکارانی بیانی و ڕێزگرتن لە مافەکانیان و پەرەپێدانی پەیوەندییەکان لەگەڵ پاکستان
‏نووسینگەی ڕاگەیاندنی سەرۆك وەزیران لە بەیاننامەیەكدا بڵاویکردەوە : محەمەد شیاع سودانی سەرۆك وەزیران پێشوازی لە ئەمینداری گشتی پارتی یەكگرتنی موسڵمانان و ئەندامی ئەنجومەنی پیرانی پاكستان، شێخ ڕاجا ناسر عەباس جەعفەری و شاندی یاوەری كرد.
‏
‏بەگوێرەی بەیاننامەكە، سەرۆك وەزیران بەخێرهاتنی شاندی سەردانكەری كرد، جەختی لە قووڵایی پەیوەندییە دووقۆڵییەكان و پەیوەندییە ئایینی و كولتوورییەكانی نێوان گەلی عێراق و پاكستان و گرنگییان لە پتەوكردنی هاوكاریی هاوبەش كردەوە. هەروەها ئاماژەی بە پێویستی كاركردن بۆ دامەزراندنی كۆمەڵەی دۆستایەتی عێراق و پاكستان و پەرەپێدانی كاری پەرلەمانی كرد لەڕێگەی كاراكردنی لیژنە هاوبەشەكانی پەرلەمانی وەك دەروازەیەك بۆ هاوكاری لە كەرتە جیاوازەكانی نێوان هەردوو وڵات.
‏سەرۆك وەزیران دووپاتی كردەوە : كە عێراق میكانیزمی كاركردنی ڕوونی هەیە كە ڕێزگرتن لە مافی كرێكارانی بیانی مسۆگەر دەكات، لە هەمان كاتدا بە لەبەرچاوگرتنی جێبەجێكردنی ئەو یاسایانەی كە ئەم بابەتە ڕێكدەخەن، ئاماژەی بەوەشكرد كە حكومەت حەز دەكات باشترین خزمەتگوزاری پێشكەش بە سەردانیكەران بكات لە بۆنە ئاینییەكان و لە سەرجەم دەروازەكانی چوونە ژوورەوە.
‏سەرۆك وەزیران جەختی لە پێویستی هەڵوێستی یەكگرتنوو و یەكگرتنی ئیسلامی لە ژێر ڕۆشنایی بارودۆخی ئێستا، بەتایبەتی لە ژێر ڕۆشنایی تاوانەكانی جینۆساید و برسێتی كە لە غەززە ڕوودەدات، ئاماژەی بە گرنگی ڕۆڵی عێراق و پاكستان لە ڕەتكردنەوەی دەستدرێژی و فراوانبوونی ململانێكان لە ناوچەكەدا كرد.
‏لای خۆیەوە شێخ جەعفەری پێزانینی خۆی بۆ سەرۆك وەزیران و گەلی عێراق، لەگەڵ سەرجەم لایەنە پەیوەندیدارەكانیان، بۆ ئەو هەوڵانەی بۆ پێشوازیكردن لە سەردانكەرانی مەزارگە پیرۆزەكانی عێراق و ئەو پێشوازییە گەرمەی لێیان دەكرێت دەربڕی، جەختیشی لە هەوڵەكانی وڵاتەكەی كردەوە بۆ پتەوكردنی هاریكاریی دووقۆڵی لە بەرژەوەندی هەردوو وڵاتی دۆست.