حکومەتی عێراق نیگەرانی خۆی لە بەئامانجگرتنی دامەزراوە ئەتۆمییەکان لە ناوخۆی ئێران دەردەبڕیت

20:25 2025-06-22 35738 عێراق 0

2025-06-22

35738

ئەمرۆ یەکشەممە، حکومەتی عێراق نیگەرانی خۆی لە بەئامانجکردنی دامەزراوە ئەتۆمییەکانی نێوخۆی کۆماری ئیسلامی ئێران دەربڕی.
"باسم عەوادی" وتەبێژی حکومەتی عێراق لە بەیاننامەیەکدا کە موتەڵع بەدواداچوونی بۆ کردووە ڕایگەیاند: "حکومەتی عێراق نیگەرانی قوڵی خۆی لە بەئامانجکردنی دامەزراوە ئەتۆمییەکان لە ناوخۆی کۆماری ئیسلامی ئێران دەربڕی و جەختیش دەکاتەوە کە "ئەم هەڵکشانە سەربازییە مەترسییەکی جددی بۆ سەر ئاشتی و ئاسایش لە ڕۆژهەڵاتی ناوەڕاست دروست دەکات و سەقامگیری ناوچەکە دەخاتە بەردەم مەترسی گەورە،بۆیە عێراق پرەنسیپی نەگۆری خۆی بۆ بەکارهێنانی هێز ڕەتدەکاتەوە لە پەیوەندییە نێودەوڵەتییەکاندا و داوای ڕێزگرتن لە سەروەری دەوڵەتان و خۆبەدوورگرتن لە بەئامانجگرتنی دامەزراوە گرنگەکانیان دەکات، بەتایبەتی ئەوانەی لەژێر چاودێری ئاژانسی نێودەوڵەتی وزەی ئەتۆمیدان و بۆ مەبەستی ئاشتیانە بەکاردەهێنرێن.
جەختیش دەکاتەوە کە چارەسەرە سەربازی ناتوانێت جێگرەوەی دیالۆگ و هەوڵی دیپلۆماسی بن و بەردەوامی ئەم هێرشانە دەبێتە هۆی هەڵکشانی مەترسی بۆ سنووری وڵاتان و کاریگەری لەسەر سەقامگیری ناوچەکە و جیهان دەبێت.
لە درێژەی بەیاننامەکەی عەوادی داهاتووە: شەڕ جگە لە وێرانکاری هیچی تر لە دوای خۆیان ناهێڵنەوە و بەرپرسیارێتی وڵاتانی زلهێز و دەزگا نێودەوڵەتییەکانە ، کە دەبێت هەوڵی ڕزگارکردنی جیهان بدەن لە قەیرانی زیاتر و ئاگری شەر .
روونیشی دەکاتەوە : کە عێراق لەسەر بنەمای بەرپرسیارێتی خۆی بەرامبەر بە ئاشتی و سەقامگیری ناوچەیی و نێودەوڵەتی، داوای کەمکردنەوەی خێرای پەرەسەندن و کردنەوەی کەناڵی دیپلۆماسی بەپەلە بۆ کۆنتڕۆڵکردنی دۆخەکە و هەوڵدان بۆ هێورکردنەوەی قەیران و دەستەبەرکردنی ئاسایشی بەکۆمەڵ و ڕێزگرتن لە یاسا نێودەوڵەتییەکان و میساقی نەتەوە یەکگرتووەکان دەکات.