پارێزگارى هەولێر و پارێزگارى پارێزگای کوردستان ڕێككه‌وتننامه‌یه‌ك ئیمزا ده‌كه‌ن، كه‌ سێ بواری جیاواز له‌ خۆ ده‌گرێت و ئامانج لێی پێشخستنی ئاستی پەیوەندییەکان و قازانجی ئابووری و خۆشگوزەرانی پارێزگاکەیە.

چوارشه‌ممه‌، 21ـی ئایاری 2025، لە چوارچێوەى سێیەمین کۆبوونەوەی هاوبەشی پارێزگا هاوسنوورییەکانی هەرێمی کوردستان و کۆماری ئیسلامیی ئێران، هەر یەک لە ئومێد خۆشناو، پارێزگاری هەولێر و ئارەشی زرێ تەنی لهۆنی، پارێزگاری کوردستان، بەمەبەستی پتەوکردن و فراوانکردنی پەیوەندییەکانی نێوان پارێزگای کوردستانی کۆماری ئیسلامیی ئێران و هەولێری پایتەختی هەرێمی کوردستان، یاداشتێكی لێکگەیشتن لە بواره‌كانی ئابووری، کولتووری - کۆمەڵایەتی، زانستی – تەکنەلۆجییان ئیمزا كرد، كه‌ ئامانج لێی بەکارهێنان و سوودەرگرتنی باشتره‌ لە ده‌رفه‌ت و تواناکان لەپێناو پێشخستنی ئاستی پەیوەندییەکان و قازانجی ئابووری و خۆشگوزەرانیی خەڵکی ناوچەکە. یاداشته‌كه‌ش چه‌ند خاڵێكی له‌ خۆ گرتووه‌، كه‌ ئه‌مانه‌ن:

ماددەی یەکەم/ تەوەری ئابووری: گەشەپێدانی هاوکاریی سنووری و پەرەپێدانی بونیاتنەرانەی ژێرخانەکان

1-1. ئاسانکاریی بازرگانی و گومرگی:

* پێکهێنانی لیژنەی ژوورەکانی بازرگانیی بۆ چارەکردنی ناکۆکی یاسایی و ناکۆکیی لە ڕێککەوتنەکانی نێوان بازرگانان و چالاکانی ئابووری دوولایەن.

*هاوکاریی لایەنی پێوەندیداری گومرگی و هێزی سنوورەڤانی بە مەبەستی گۆڕینەوەی ئەزموون و ئاسانکاریی بازرگانیی یاسایی و نەهێشتنی کێشەکان لە ئیقامەی هاوڵاتیان.

* زەمینەسازی هەلومەرج بۆ گواستنەوەی ڕاستەوخۆی کاڵای هەناردەکراو و ئەوانەی کە ئەولەویەتی ماوەبەسەرچوونیان هەیە و خێرا خراپ دەبن و بەرهەمی کشتوکاڵی لە ڕێگای سیستەمی گواستنەوەی دوولایەن یان لە ڕێگەی کۆمپانیای هاوبەشی نێودەوڵەتی گواستنەوە.

* خۆبەدوورگرتن لە بڕیاری لەناکاو و بێپلانی سنووردارکردن لە گواستنەوەی کاڵا و ئاگادارکردنەوەی دەسبەجێی لە ڕێگای سکرتاریەتی هاوبەشەوە.

1-2. سەرمایەگوزاریی هاوبەش:

* هاندان و ڕاکێشانی سەرمایەدارانی بەتوانا و شایستە بۆ وەبەرهێنانی هاوبەش.

* ئەنجامدانی کۆنفرانسی هەلی سەرمایەگوزاریی هاوبەش.

1-3. ژێرخانەکان، گواستنەوە و خزمەتگوزاری تەکنیکی و ئەندازیاری:

* ئاسانکاری بۆ ئاڵوگۆڕی خزمەتگوزاری تەکنیکی و ئەندازیاری و هاوکاری لە پڕۆژەکانی بیناسازی، پەرەپێدانی ژێرخانی و پەرەپێدانی ڕێڕەوی گواستنەوە.

1-4. ئابووریی تەندروستی

* پێشکەشکردنی خزمەتگوزاری پزیشکی پسپۆڕی (تخصصی)  و پسپۆڕیی ورد (فوق تخصصی) بە نەخۆشەکان لە هەرێمی کوردستان لە سەنتەرە پزیشکییەکانی  پارێزگای کوردستان (نەشتەرگەریی  پسپۆڕیی ورد، ژنان و منداڵبوون، شێرپەنجە، جوانکاری و پزیشکی ددان و …)

* برەودان و بەهێزکردنی گەشتیاریی تەندروستی، گەشەپێدانی ئێکۆتوریسمی تەندروستی و ڕێکخستنی بازاڕی نافەرمیی گەشتیاریی تەندروستی لەپێناو پاراستنی مافی ئەوانەی خزمەتی پزیشکی وەردەگرن

مادده‌ی دووه‌م/ تەوەری کولتووری - کۆمەڵایەتی - ژینگەیی: بەهێزکردنی شوناسی هاوبەش و هاوکارییە کولتوورییەکان

2-1. میراتی ڕۆشنبیری و گەشتیاری:

* ئەنجامدانی بۆنە هاوبەشەکان لەوانە فێستیڤاڵ، گەشتی ئاشنابوون بە گەشتیاری، کۆنفرانس و پێشانگای تایبەتمەند لە بواری گەشتیاری و کاری دەستی.

* زەمینەسازیی بۆ بەرفراوان کردنی هاوکاریی کۆمپانیای گەشتیاری بە مەبەستی پەرەپێدانی گەشتیاری و جێبەجێکردنی گەشتە هاوبەشەکان.

* پلاندانان بۆ گەشتی هۆشیاری و بەبازاڕکردن بۆ کۆمپانیا و چالاکوانانی بواری گەشتیاری تەندروستی بۆ سەردانی ئەو نەخۆشخانەیانەی مۆڵەتیان هەیە بۆ وەرگرتنی نەخۆشی نێودەوڵەتی (IPD) هەروەها شوێنە گەشتیارییەکان (ئیکۆتۆریسم) لەگەڵ جەختکردنەوە لەسەر گەشتیاری تەندروستی.

* ئاسانکاری بۆ هاتووچۆی گەشتیاران و زیارەتکاران لە ڕێگەی سنووری و مۆڵەتی ئاسانکراو.

* بوژانەوەی ڕێگای زیارەتی و مێژووییە هاوبەشەکان بۆ سەردانی شوێنە ئاینی و مێژووییەکان و پەرەپێدانی ژێرخانی گەشتیاری

2-2. ڕۆشنبیری و هونەر:

* دانانی بناغەی بەڕێوەچوونی دوو ساڵانەی هەفتەی هونەری کوردی (فیلم، شانۆ، فێستیڤاڵەکانی مۆسیقا و هتد)

* هەوڵدان بۆ پێناسەکردن و دامەزراندنی خەڵاتی ئەدەبی - هونەری و کردنەوەی پێشانگای هاوبەشی کتێب و  بەرهەمی هونەری.

* هەوڵدان بۆ دروستکردنی ئەرشیڤێکی دیجیتاڵی و داتابەیسێکی هاوبەش لە ئەدەبیات و مۆسیقا و ئاوازی کوردی لۆکاڵی بە هاوکاری زانکۆ و دامەزراوە ئەدەبییەکان و دامەزراوەکان و هونەرمەندانی هەردوولا.

2-3. بوارەکانی کار و خوشگوزەرانی کۆمەڵایەتی:

*هەوڵدان بۆ بەستنی ڕێککەوتن لەبواری ئاڵوگۆڕی هێزی کار و پاراستنی یاسایی بۆ هێزی کاری لایەنەکان.

* دامەزراندنی سەنتەری ڕاوێژکاری پیشەیی و گەڕان بەدوای کاردا بە مەبەستی ئاسانکاری لە مەرجەکانی ناردنی هێزی کار لە هەردوو لایەنەوە.

*هاوکاری لە پەرەپێدانی ستانداردەکانی ڕاهێنانی کارامەیی و سەرچاوەکانی فێرکردن و خۆجێیکردنیان لە چوار بەشی پیشەسازی، خزمەتگوزاری، کشتوکاڵ، و ڕۆشنبیری و هونەر، و دامەزراندنی ناوەندی تەکنیکی و پیشەیی هاوبەش.

2-4. ژینگە و سەرچاوە سروشتییەکان

* پەرەپێدانی هاوکاریی بۆ دۆزینەوەی ڕێکاری پاراستنی دارستان و سەرچاوە ژینگەییەکان و سوودەکان و چارەسەرکردنی ئاستەنگە هاوبەشە ژینگەییەکان.

* ئاڵوگۆڕی ئەزموونی ژینگەیی و ڕاهێنان بۆ پێشخستنی چارەسەرکردنی ئاستەنگە ژینگەییەکانی هەردوو لایەن.

ماددەی سێیەم/ خوێندنی باڵا و داهێنان و تەکنەلۆژیا

* بەهێزکردنی هاوکاری دوولایەنە لە نێوان زانکۆکانی هەردوولا بەتایبەتی لە بوارە زانستییە نوێیەکانی وەک زیرەکی دەستکرد.

* فراوانکردنی هاوکاری لە بواری ئاڵوگۆڕی مامۆستا و خوێندکار لە نێوان زانکۆکانی دوو لایەن.

* بەڕێوەبردنی کۆنفرانس و بۆنەی هاوبەشی زانستی و ڕۆشنبیری لە نێوان زانکۆکانی هەردوولا.

* هەوڵدان بۆ کردنەوەی پلاتفۆرمی پەروەردەی ئۆنلاین (زانکۆی مەجازی) بە پێشکەشکردنی خولی هاوبەش.

* کردنەوەی کورسییەکانی توێژینەوەی هاوبەشی یونسکۆ.

* پێناسەکردن و ئەنجامدانی پڕۆژەی توێژینەوەی هاوبەش لە بواری تەحەددای هاوبەش وەک قەیرانی ئاو و وشکەساڵی، خۆڵ و ئاسایشی خۆراک و هتد، هەروەها پێدانی هەلی خوێندنی ٦ مانگ بە توێژەران لە زانکۆ و ناوەندەکانی توێژینەوەی لایەنەکان.

* زانکۆکانی هەرێم و زانکۆی کوردستان، هەوڵ بدەن بۆ یەکگرتن و یەکخستنی زمانی کوردی بە گشت دیالێکتەکان بە شێوەی دیجیتاڵ.

* هاوکاریکردن لە پەرەپێدانی ستانداردەکانی ڕاهێنانی کارامەیی و سەرچاوەی خولەکان و ئەنجامدانی خولی ڕاهێنان بۆ ڕاهێنەرانی کارامەیی پێویست بۆ هەرێمی کوردستانی عێراق لە ناوەندەکانی ڕاهێنانی تەکنیکی و پیشەیی (فنی و حرفه‌ای) ئێران.

* هاوکاری بۆ پەرەپێدانی ئابووری دیجیتاڵی و ناساندنی توانا و بازرگانی لایەنەکان لە بواری تەکنەلۆژی.

* یارمەتیدان لە وەبەرهێنان لە یەکەکانی تەکنەلۆژیا و کۆمپانیاکانی بنەمای زانیاری (دانش‌بنیان) و تەکنەلۆژیا/ بازاڕی تەکنەلۆژیا بۆ ئاسانکاری هەناردەکردنی بەرهەم و خزمەتگوزارییەکانی کۆمپانیاکانی بنەمای زانیاری.

مادەی چوارەم: بەدواداچوون و جێبەجێکردن

* هەر دوو پارێزگار بە بەردەوامی لە پێوەندیدان بۆ جێبەجێ کردنی خاڵەکان و بڕگەکانی ئەم لێکگەیشتنامە بە هەماهەنگیی کونسووڵخانەی کۆماری ئیسلامی ئێران لە هەولێر و پێوەندییەکانی دەرەوەی هەرێمی کوردستانی عێراق

.