عێراق 40 ملیۆن دۆلار بۆ ئاوەدانكردنەوەی غەززەو لوبنان دابین دەكات ‏

15:23 2025-05-17 66661 عێراق 0

2025-05-17

66661

محەمەد شیاع سودانی، سەرۆك وەزیران رایگەیاند، وڵاتەكەی 20 ملیۆن دۆلار بۆ ئاوەدانكردنەوەی غەززەو 20 ملیۆن دۆلاریش بۆ ئاوەدانكردنەوەی لوبنان دابین دەكات.
‏نوسینگەی راگەیاندنی سەرۆک وەزیران لە بەیاننامەیەکدا رایکەیاند: محەمەد شیاع سودانی، سەرۆك وەزیران، ئەمڕۆ شەممە، لە وتارێكدا لە كۆبونەوەی لوتكەی عەرەبی لە بەغدا، رایگەیاند، گەلانی عەرەب ئەمڕۆ بەو هیوایەوە چاویان لەوەیە كە هەڵوێستەكان بكرێنە چارەسەر.
‏وتیشی، عێراق لە سیاسەتی دەرەوەیدا رێگەی شەراكەوت و هاریكاری و بەهێزكردنی بەرژەوەندییە هاوبەشەكانی وڵاتانی عەرەبی گرتۆتەبەر.
‏ئاماژەی بەوەشدا، پشتیوانیمان لەو چارەسەرانە كردوە كە لەسەر بنەمای گفتوگۆ و لێكتێگەیشتنن و بەشداریمان كردوە لە نزیككردنەوەی تێڕوانینە لێك دورەكان و عێراق رێگەی دیپلۆماسیەتێكی بەرهەمداری گرتۆتەبەر بۆ بەشداریكردن لە گەشەپێدانی برایەتی و ئایین و بیری میانڕەوی.
‏سودانی جەختیشی لە مافەكانی گەلی فەلەستین كردەوە لەسەر خاكی خۆی لەگەڵ راگرتنی دەستدرێژییەكان بۆ سەر غەززەو وتیشی، راگواستنی زۆرەملێی فەلەستینییەكان رەتدەكەینەوە.
‏ئاماژەی بەوەشداوە، پشتیوانی لە ئاگربەست لە باشوری لوبنان دەكەین و ئیدانەی دەستدرێژییە دوبارەكان بۆ سەر سەروەری ئەو وڵاتە دەكەین.
‏هەروەها هێمای بۆ ئەوەش كرد، هەڵوێستی خۆمان بۆ یەكپارچەیی خاكی سوریاو سەروەری ئەو وڵاتە دوپات دەكەینەوەو هەر دەستدرێژییەك یان هەژمونێك لەسەر خاكی سوریا رەتدەكەینەوە.
‏وتیشی، بڕیاری ئەمریكا بۆ هەڵگرتنی سزاكان لەسەر سوریا بەرز دەنرخێنین.
‏هێمای بۆ ئەوەش كرد كە عێراق لەگەڵ یەكپارچەیی و سەروەریی یەمەن و كۆتاییهێنان بە شەڕو دابەشبوندایە.
‏هەروەها لەبەشێكی دیكەی قسەكانیدا پێشوازی و پشتیوانی عێراقی بۆ دانوستانەكانی نێوان ئەمریكاو ئێران دوپاتكردەوە.
‏هەروەك وتیشی، 18 دەستپێشخەری رادەگەیەنین بۆ كاراكردنەوەی كاری هاوبەشی عەرەبی و لەپێش هەمویشیانەوە دامەزراندنی سندوقی عەرەبی بۆ پشتیوانیكردنی هەوڵەكانی ئاوەدانكردن لە دوای شەڕو ململانێكان.
‏ئەوەشی خستەڕو، عێراق 20 ملیۆن دۆلار بۆ ئاوەدانكردنەوەی غەززەو 20 ملیۆن دۆلاریش بۆ ئاوەدانكردنەوەی لوبنان دابین دەكات.