عێراق و تورکیا پشتیوانی خۆیان بۆ سەقامگیری و گواستنەوەی سیاسی لە سوریا دووپات دەکەنەوە

19:01 2025-05-08 38666 عێراق 0

2025-05-08

38666

محەمەد شیاع سودانی سەرۆک وەزیران و ڕەجەب تەیب ئەردۆغان سەرۆک کۆماری تورکیا ئەمڕۆ پێنجشەممە، پشتیوانی خۆیان بۆ سەقامگیری و گواستنەوەی سیاسی لە سوریا و گەلەکەی دووپاتکردەوە.
نوسینگەی ڕاگەیاندنی سەرۆکی ئەنجومەنی وەزیران لەڕاگەیەندراوێکدا کەدەستی موتەڵع کەوتووە بڵاویکردەوە"لە چوارچێوەی سەردانە فەرمییەکەیدا بۆ ئەنقەرەی پایتەختی تورکیا سەرۆکی ئەنجومەنی وەزیران محەمەد شیاع سودانی و سەرۆک کۆماری تورکیا ڕەجەب تەیب ئەردۆغان، کۆبوونەوەیەکی دوولایەنەیان ئەنجامدا و تێیدا تاوتوێی سەرجەم پەیوەندییە دووقۆڵییەکانی نێوان هەردوو وڵات و چۆنیەتی جێبەجێکردنی ئەو ڕێککەوتننامانە کرا، کە پێشتر لە نیسانی 2024 لەنێوان هەردوولا واژۆ کرابوون.

وتیشی هەروەها جەختیان لەسەر تەواوکردنی هەوڵە چۆنایەتییە هاوبەشەکان کردەوە بۆ پەرەپێدانی هاوکاری، و بەڕێز سودانی ئاماژەی بە پەرۆشی هەردوولا کرد بۆ جێبەجێکردنی دەرئەنجامەکانی رێککەوتنی چوارچێوەی ستراتیژی بۆ هاوکاری هاوبەش، بەمەبەستی بەرزکردنەوەی توانای هەردوو وڵات بۆ ڕووبەڕووبوونەوەی ئاستەنگە هاوبەشەکان.

ڕوونیشیکردەوە سودانی ئاماژەی بەوەکرد کە عێراق هاوکاری بنیاتنەری هاوبەش و دەرئەنجامەکانی میکانیزمی ئاسایشی ئاست بەرز و دیالۆگی ڕاشکاوانە و شەفاف بەرز دەنرخێنێت، کە باس لە لایەنە ئەمنییەکانی هەردوو وڵات بەتایبەتی لە بواری بەرەنگاربوونەوەی تیرۆر و قاچاخێتی بە مرۆڤ و ماددە هۆشبەرەکانەوە دەکات .

ڕایشیگەیاند سودانی ئاماژەی بە پڕۆژەی ڕێگای گەشەپێدان و بەشدارییەکانی لەسەر ئاستی نێودەوڵەتی و ناوچەیی کرد لە برەودان بە یەکخستنی ئابووری و بەرزکردنەوەی ئاستی ئاڵوگۆڕی نێوان عێراق و تورکیا و ڕەخساندنی دەرفەتی فراوان و هەمەجۆر بۆ گەشەپێدان، و ناوچە پیشەسازی و کشتوکاڵییەکان و هاوکاری نێوان کەرتی تایبەت لە هەر یەک لە عێراق و تورکیا، جگە لە بوارەکانی خوێندنی باڵا و توێژینەوەی زانستی و بوارە ڕۆشنبیرییەکان و بوارەکانی دیکەی هاریکاری.

لە کۆبوونەوەکەدا گرنگترین ڕووداوەکانی ناوچەکە و پێشهاتەکانی تاوتوێ کرا و تێیدا ئیدانەی دەستدرێژییە بەردەوامەکانی سەر غەززە کرا، جگە لە باس کردنی هەڵوێستە هاوشێوەکانی عێراق و تورکیا لەو بارەیەوە، هەروەها جەختیان لەسەر گرنگی ڕێگەدان بە گەیاندنی هاوکارییە مرۆییەکان و کشانەوەی تەواوی داگیرکارییەکان کردەوە، سەبارەت بە پرسی سوریاش جەختی هاوبەش کرایەوە لەسەر پشتیوانیکردن لە سەقامگیری و گواستنەوەی سیاسی تێیدا و یارمەتیدانی گەلی سوریا لە قەیرانەکانیدا و پێویستی بەهێزکردنی سەروەری و ڕەتکردنەوەی قۆستنەوەی دۆخی ئێستا بۆ دەستتێوەردان لە کاروباری ناوخۆی و پێویستی پاراستنی فرەیی و هەمەچەشنی پێکهاتەکانی کۆمەڵگای سوریا.