کۆمکاری عەرەبی هەوڵەکانی عێراق لە پشتیوانیکردنی کردەوەی هاوبەشی عەرەبی دەنرخێنێت

21:47 2025-05-06 52697 عێراق 0

2025-05-06

52697

ئەمڕۆ سێشەممە قەحتان تەها خەڵەف، نوێنەری عێراق لە کۆمکاری عەرەبی دووپاتی کردەوە کە "بەغدا ئامادەیە میوانداری لوتکەی عەرەبی بکات". هاوکات کۆمکاری عەرەبی ستایشی هەوڵەکانی عێراقی کرد لە پاڵپشتیکردنی کردەوەی هاوبەشی عەرەبی و میوانداریکردنی لوتکەکە.
باڵیۆزخانەی عێراق لە قاهیرە لەڕاگەیەندراوێکدا کەدەست موتەڵع کەوتووە، تێیدا هاتووە: "باڵیۆزی کۆماری عێراق لە کۆماری میسری عەرەبی و نوێنەری هەمیشەیی وڵاتەکەی لە کۆمکاری وڵاتانی عەرەبی، قەحتان تەها خەڵەف، لەگەڵ باڵیۆز حوسام زەکی یاریدەدەری سکرتێری گشتیی کۆمکاری وڵاتانی عەرەبی، لە بارەگای ئەمینداریەتی گشتی کۆبووەوە". لە ڕاگەیەندراوەکەدا ئاماژە بەوەشکراوە، لە کۆبوونەوەکەدا باس لە ڕێگاکانی پتەوکردنی هاریکاری و هەماهەنگی هاوبەشی نێوان عێراق و کۆمکاری عەرەبی کراوە، هەروەها ئامادەکارییەکانی عێراق بۆ میوانداریکردنی لوتکەی عەرەبی داهاتوو لە بەغدا.
خەڵەف جەختیشی کردەوە لە "ئامادەیی و پابەندبوونی عێراق بە دابینکردنی هەموو توانایەکی پێویست بۆ دەستەبەرکردنی سەرکەوتنی لوتکەکە،کە ئەمەش ڕەنگدانەوەی هەڵوێست و پابەندبوونی عێراقە بە ڕۆڵی نیشتمانی کاریگەری خۆی لە چوارچێوەی سیستەمی عەرەبیدا".
لای خۆیەوە، باڵیۆز حوسام زەکی، ستایشی هەوڵەکانی عێراقی کرد لە پاڵپشتیکردنی کردەوەی هاوبەشی عەرەبی و ئامادەیی و هەوڵەکانی بۆ میوانداریکردنی لوتکەی عەرەبی و جەختی لە "گرنگی هەوڵە هاوئاهەنگەکانی عەرەبی لەم قۆناغە گرینگەدا، بەتایبەتی سەبارەت بە پاڵپشتیکردنی گەلی فەلەستین و بەهێزکردنی یەکگرتوویی پێگەی عەرەبی لە کۆڕ و و کۆڕبەندە هەرێمی و نێودەوڵەتییەکاندا" کردەوە.