مەشهەدانی جەخت لەسەر گرنگی پاراستنی ئاشتی کۆمەڵایەتی لە ناوچەکەدا دەکاتەوە

22:55 2025-04-17 108768 عێراق 0

2025-04-17

108768

مەحمود مەشهەدانی سەرۆک پەرلەمان ئەمڕۆ پێنجشەممە جەختی لە گرنگی پاراستنی ئاشتی کۆمەڵایەتی لە ناوچەکەدا کردەوە.

نوسینگەی ڕاگەیاندنی سەرۆكی ئەنجومەنی نوێنەران، لە بەیاننامەیەكدا كە دەستی ئاژانسی موتەڵع کەوتووە، دەڵێت: سەرۆكی ئەنجومەنی نوێنەران مەحمود مەشهەدانی، لە نووسینگەی فەرمی خۆی لەگەڵ بریكاری وەزیری دەرەوەی توركیا نوح یەڵماز و وەفدی یاوەری كە پێكهاتبوو لە باڵیۆزی توركیا لە بەغداد ئەنیل بورا ئەنان و ژمارەیەك لە ئەندامانی دیپلۆماسی توركیا كۆبووەوە.
ئاماژەی بەوەشكرد: لە كۆبوونەوەكەدا گفتووگۆ كرا لەبارەی قووڵایی پەیوەندییە مێژووییەكانی نێوان عێراق و توركیا و ئەو پەیوەندییە بەهێزانەی كە هەردوو وڵات یەكدەخەن، لەسەر بنەمای نزیكیی جوگرافی و نزیكایەتی كولتووری و پەیوەندی مێژوویی، و بەها ئایینی و كۆمەڵایەتییە هاوبەشەكان.
هەر بەگوێرەی بەیاننامەكە، هەردوولا جەختیان كردەوە: لەسەر گرنگی پتەوكردن و پەرەپێدانی ئەو پەیوەندییانە لە بوارە جیاوازەكانی سیاسی و ئابووری و كۆمەڵایەتیدا، بە شێوەیەك كە خزمەت بە بەرژەوەندییەكانی هەردوو گەل بكات و گەشەپێدان و سەقامگیری لە ناوچەكەدا بەدەستبهێنێت.
لە درێژەی بەیاننامەكەدا هاتووە، لە كۆبوونەوەكەدا باس لە پێشهاتەكانی گۆڕەپانی ناوچەكە كرا، دیارترینیان تێكچوونی دۆخی مرۆیی لە كەرتی غەززە، و هەروەها مەشهەدانی داوای كۆتایی هێنانی بەپەلەی شەڕی ناڕەوا لە دژی خەڵكی سڤیل لەوانە ژنان و منداڵان و بەساڵاچووان كرد، و جەختیكردەوە: كە عێراق لەگەڵ گەلی فەلەستین وەستاوە لە خەباتی ڕەوای خۆیان بۆ گەیشتن بە مافەكانیان.