سودانی فەرمانیدا هەموو ئاسانکارییەکان بۆ هەفتەی ڕۆشنبیری قەتەر لە بەغدا پێشکەشبکرێت ‏

12:08 2025-04-17 77707 عێراق 0

2025-04-17

77707

"محەمەد شیاع سودانی" سەرۆکی ئەنجومەنی وەزیران، فەرمانیدا بە پێشکەشکردنی هەموو جۆرە ئاسانکارییەکان بۆ بەرێوەچوونی هەفتەی ڕۆشنبیری قەتەر لە بەغدا.
‏ئەمڕۆ پێنجشەممە ،لە ڕاگەیەندراوێکی نووسینگەی ڕاگەیاندنی سەرۆکی ئەنجومەنی وەزیراندا هاتووە : "سودانی " پێشوازی لە " عەبدولڕەحمان بن حەمەد ئال سانی" وەزیری ڕۆشنبیری قەتەر کرد.
‏لە دیدارێکدا گفتوگۆ لەسەر پەیوەندییە دووقۆڵییەکان و چۆنێتی بەهێزکردنی ئاڵوگۆڕی شارەزایی و ئەزموون لە بوارەکانی ڕۆشنبیریدا کرا.
‏بەگوێرەی ڕاگەیەندراوەکە "سودانی" جەختی لە پێویستی بەردەوامی و هەماهەنگی و کاری هاوبەش کردەوە بۆ پشتگیری کەرتەکانی ڕۆشنبیری و گەشتوگوزار و شوێنەوار و دەرخستنی ڕۆڵی گرنگیان لە کۆمەڵگادا،هەروەها ئاماژەی بە پێشکەوتنی پەیوەندییەکانی نێوان هەر دوو وڵات لە چەندین بواردا کرد،لەوانەش لایەنی ڕۆشنبیری.
‏هەر بەگوێرەی ڕاگەیەندراوەکە : سەرۆکی ئەنجومەنی وەزیران،جەختیشی لە گرنگی ڕۆشنبیری کردەوە لە گەشەپێدان و بەهێزکردنی ناسنامەی نیشتمانی و ڕۆڵی چالاکییە ڕۆشنبیرییە جۆراوجۆر و هاوبەشەکان لە پتەوکردنی پەیوەندی نێوان گەلانی برا و دۆست،هەروەک ستایشی هەفتەی ڕۆشنبیری عێراقی کرد کە دوو مانگ پێش ئێستا لە دەوحە بەڕێوە چوو.
‏وەک ڕاگەیەندراوەکە ئاماژەی پێداوە ، لە لایەن خۆتەوە، وەزیری ڕۆشنبیری قەتەر سڵاوی میری قەتەری گەیاندە "سوودانی" و ئاماژەی بەوە کرد کە وڵاتەکەی پەرۆشە بۆ بەهێزکردنی هاوکاری هاوبەش لەگەڵ عێراق،و ستایشی هەوڵەکانی سەرۆکی ئەنجومەنی وەزیرانی کرد بۆ بەدیهێنانی گەشەپێدانی گشتگیر و پشتگیری ڕۆشنبیری، و دووپاتیشی کردەوە کە هەڵبژاردنی بەغدا وەک پایتەختی گەشتوگوزاری عەرەبی بۆ ساڵی 2025 خاڵێکی گرنگی دەستپێکە بۆ بەهێزکردنی هاوکاری ڕۆشنبیری.