یه‌كگرتو به‌بۆنه‌ی ساڵیادی كاره‌ساتی ئه‌نفاله‌وه‌ په‌یامێكی پێنج خاڵی بڵاودەکاتەوە

00:42 2025-04-14 51120 كوردستان 0

2025-04-14

51120

مه‌كته‌بی سیاسی یه‌كگرتوی ئیسلامییی كوردستان له‌په‌یامێكی پێنج خاڵیدا به‌بۆنه‌ی ساڵیادی كاره‌ساتی ئه‌نفاله‌وه‌ رایده‌گه‌یه‌نێت، دوای تێپه‌ڕینی زیاتر له‌ 30 ساڵ به‌سه‌ر دامه‌زراندنی حكومه‌تی هه‌رێمدا هێشتا هاوڵاتییانی كوردستان و كه‌سوكاری قوربانییان خزمه‌تگوزارییه‌ سه‌ره‌تاییه‌كانیشیان ده‌سته‌به‌ر نه‌بوه‌ و پرسی دادپه‌روه‌ری و مافه‌كانی هاوڵاتیبون له‌ژێر پرسیاری گه‌وره‌دان.

مه‌كته‌بی سیاسی یه‌كگرتو له‌په‌یامێكدا بڵاویكردۆته‌وه‌، "گه‌لی كوردمان له‌ هه‌رێمی كوردستان ڕوبه‌ڕوی چه‌ندین هێرش و په‌لاماری ره‌شكوژی و جینۆساید بوه‌ته‌وه‌، یه‌كێك له‌وانه‌ جینۆسایدی به‌ناو ئه‌نفاله‌، له‌ساڵڕۆژی ئه‌م جینۆسایده‌ و پاش تێپه‌ڕینی 37 ساڵ به‌سه‌ریدا هێشتا برینه‌كان به‌سۆن و كاریگه‌رییه‌كانی به‌رده‌وامن، زۆرێك له‌ خواست و داواكارییه‌كانی كه‌سوكاری ئه‌نفالكراوان جێبه‌جێنه‌بون و ئه‌م كه‌یسه‌ مرۆیی و نه‌ته‌وه‌ییه‌ گه‌وره‌یه‌ له‌ ئاستی ناوخۆ و ده‌ره‌وه‌ به‌ره‌و په‌راوێزخستنی زیاتر ڕۆیشتوه‌".

ئێمه‌ له‌ یه‌كگرتوی ئیسلامیی كوردستان و له‌ ساڵڕۆژی ئه‌م جینۆسایده‌دا، داواكارین ئه‌م خاڵانه‌ كاری زیاتر و جیدی بۆ بكرێت:

یه‌كه‌م:
قه‌ره‌بوی مادی و مه‌عنه‌وی كه‌سوكاری ئه‌نفالكراوان بكرێته‌وه‌ كه‌ تاوه‌كو ئێسته‌ سه‌ره‌ڕای ده‌رچونی بڕیار هێشتا مره‌كه‌بی سه‌ركاغه‌زه‌و نه‌چوه‌ته‌ بواری جێبه‌جێبونه‌وه‌.

دوه‌م:
كاری تیم و ده‌زگایی و كرداریی سپۆنسه‌ركراو بكرێت بۆ به‌جیهاننناساندنی ئه‌م تاوانه‌ و به‌ جینۆسایدناساندنی له‌ ئاستی داموده‌زگا فه‌رمییه‌ نێوده‌وڵه‌تییه‌كان.

سێیه‌م:
كاری زیاتری دیكۆمێنتاریی به‌شێوازی جۆراوجۆر په‌ره‌ی پێبدرێت و بكرێته‌ كه‌ره‌سته‌ی به‌دیهێنانی خواسته‌ ڕه‌وا نه‌ته‌وه‌ییه‌كانی گه‌لی كورد و پارێزبه‌ندیی بۆ ئه‌وه‌ی جارێكیتر جینۆساید به‌رامبه‌ر گه‌لی كورد ڕونه‌داته‌وه‌.

چواره‌م:
پرۆسه‌ی وه‌رگرتنی نمونه‌ی خوێن له‌ كه‌سوكاری قوربانییان وه‌ربگیرێ و هێنانه‌وه‌ی ڕوفاتی قوربانییه‌كان خێراتر بكرێت و پشكنینیDNA یان بۆ ئه‌نجام بدرێت ، تاوه‌كو بناسرێنه‌وه‌ و كه‌سوكاریان دیاری بكرێت.

پێنجه‌م:
ده‌بو ئێستا چاكسازی له‌داموده‌زگاكانی حكومه‌تی هه‌رێمدا ته‌واوكرابایه‌ و دۆخێكی پڕ له‌ دادگه‌ری و خۆشگوزه‌رانیی بۆ هاوڵاتیانی هه‌رێم به‌گشتی و كه‌سوكاری قوربانیانی ئه‌نفال به‌تایبه‌تی فه‌راهه‌م كرابایه‌ ، به‌داخه‌وه‌ و دوای تێپه‌ڕینی زیاتر له‌ 30 ساڵ به‌سه‌ر دامه‌زراندنی حكومه‌تی هه‌رێمدا هێشتا هاوڵاتییانی كوردستان و كه‌سوكاری قوربانییان خزمه‌تگوزارییه‌ سه‌ره‌تاییه‌كانیشیان ده‌سته‌به‌ر نه‌بوه‌ و پرسی دادپه‌روه‌ری و مافه‌كانی هاوڵاتیبون له‌ژێر پرسیاری گه‌وره‌دان.