بڕیارە ئەمڕۆ هەینی، وەفدی دانوستانكاری یەكێتیی بۆ گفتوگۆكردن لەبارەی پێكهێنانی كابینەی نوێی حكومەتی هەرێم، لە سلێمانی لەگەڵ نەوەی نوێ‌ كۆببێتەوە.
سەردانی وەفدی دانوستانكاری یەكێتیی نیشتمانیی كوردستان بۆ لای لایەنە سیاسییەكان بەردەوامە و بڕیارە ئەمڕۆش وەفدەكە بە سەرۆكایەتی قوباد تاڵەبانی لە سلێمانی لەگەڵ نەوەی نوێ كۆببێتەوە بۆ گفتوگۆكردن لەبارەی پێكهێنانی كابینەی دەیەمی حكومەتی هەرێم.
هاوكات سەعدی ئەحمەد پیرە وتەبێژی یەكێتی بە دەنگی ئەمریكای رایگەیاندووە، كۆبوونەوەی یەكێتیی لەگەڵ لایەنەكان بۆ ئەوەیە هەڵوێستییان لەسەر پێكهێنان و بەشداریكردن لە حكومەتی داهاتوو بزانرێت. راشیگەیاندووە، دوای كۆبوونەوەی پەرلەمانی كوردستان كۆبوونەوەی نێوان یەكێتیی و پارتیش ئەنجامبدەدرێت.
تا ئێستا وەفدی دانوستانكاری یەكێتیی لەبارەی پێكهێنانی كابینەی دەیەمی حکومەتی هەرێم، لەگەڵ هەریەک لە كۆمەڵی دادگەری و یەكگرتووی ئیسلامی و بزوتنەوەی گۆران كۆبووەتەوە، بڕیاریشە ئەمڕۆ هەینی لەگەڵ نەوەی نوێ کۆببێتەوە، دواییش پارتی.

شایەنی باسکردنە، ڕۆژی چوارشەممەی ڕابردووە شاندێکی دانوستکارانی پارتی بە سەرۆکایەتیی پشتیوان سادق سەردانی نەوەی نوێیان کرد و لەگەڵیان کۆبوونەوە.
شاندەکەی پارتی پێکهاتبوون لە پشتیوان سادق ئەندامی مەکتەبی سیاسی پارتی و دڵشاد شەهاب ئەندامی شاندی دانوستانکاری پارتی، لەکۆبوونەوەکە گفتوگۆیان لەسەر پێکهێنانی کابینەی دەیەمی حکومەتی هەرێمی کوردستان کرد.
هەر لە سلێمانی، دوای نەوەی نوێ شاندەکەی پارتی سەردانی یەکێتیی و چەند لایەنێکی تری کرد لەسەر پرسی پێکهێنانی کابینەی نوێی حکومەت.
ئەمەش لەکاتێکدا، ڕۆژی 7ـی ئەم مانگە، میدیای جوڵانەوەی نەوەی نوێ ڕایگەیاندبوو، کە ئامادەن لەحکومەتدا بەشداربن ئەگەر پۆستی سەرۆک وەزیران بەدەست نەوەی نوێوە بێت یان تەواوی پۆستەکانی سەرۆکایەتی هەرێم، پەرلەمان و 23 وەزارەتەکە بەدەست ئەوانەوە بێت.
بەگوێرەی میدیای NRT نزیک لە نەوەی نوێ، بەپێی پرۆژەکەی نەوەی نوێ هەرلایەنێک سەرۆک وەزیران وەربگرێت تەواوی پۆستەکانی تر بۆ لایەنەکەی تر دەبێت.
نەوەی نوێ ڕاشیگەیاندبوو: ئێمە لەو لایەنانە نین کە بە سێ چوار وەزارەت رازی بین و بچینە حکومەت و ئامانجی ئێمە گۆرانکارییە لە حکومرانی و خزمەتکردنی خەڵکە، هەروەها ئامانجمان کۆتاییهێنانە بەو شێوازە شکستخواردوەی حکومرانی پارتی و یەکێتیی کە لە رابردوودا هەبووە.

زانیاری زیاتر...
ئەو سەردانەی شاندی پارتی و یەکێتیی بۆ نەوەی نوێ و لایەنەکان بۆ پێکهێنانی حکومەت، دوای ئەوە دێت کە ڕۆژی سێشەممەی ڕابردوو 26ـی تشرینی دووەمی 2024، دڵشاد شەهاب، وتەبێژی سەرۆکایەتی هەرێمی کوردستان لە کۆنگرەیەکی ڕۆژنامەوانیدا ڕایگەیاندبوو، کە سەرۆکایەتی هەرێم ڕۆژی یەکەمی دانیشتنی خولی شەشەمی پەرلەمانی هەرێمی کوردستان دیاریکرد و گوتی: "ڕۆژی 2ـی تشرینی یەکەمی 2024، دانیشتنی یەکەمی خولی شەشەمی پەرلەمانی هەرێمی کوردستان بەڕێوەدەچێت".