كامەران عوسمان، لێپرسراوی بەشی مافی مرۆڤ لە ڕێكخراوی CPT ئەمەریكی رایگەیاند، زۆرترین هێرشی سوپای توركیا بۆ ناوچە سنورییەكانی پارێزگای دهۆک دەکرێت.
کامەران عوسمان دەشڵێت، هێرشەکانی تورکیا بۆ سەر ناوچەکانی هەرێمی کوردستان لە شەش مانگی رابردوودا بەم جۆرە بووە، پارێزگای دهۆك 365 هێرشی فڕۆکەوانی کراوەتەسەر، پارێزگای هەولێر 356 هێرش و بۆردوومان، پارێزگای سلێمانی 102 هێرش و بۆردوومان و لە پارێزگای نەینەوا لە عێراق 10 هێرش و بۆردوومان لەڕێگەی فڕۆکەکانی تورکیا ئەنجامدراوە.
ئاماژەی بەوەشکرد، بەتەنیا لەماوەی دوو ڕۆژی ڕابردوودا، سوپای توركیا 27 بۆردوومانی بۆ سەر زنجیرە چیای مەتینا و گەلی ڕەشاڤا لە قەزای ئامێدی، چیای ساوێن لە بناری قەندیل، لوتكەی كوڕاشەڵ و بناری چیای كێوەڕەش لە ڕانیە، چیای جاسوسان لە قەزای پشدەر، گوندی كانی میرانی كۆماری و نزارە لە قەزای پێنجوێن ئەنجامداوە.
کامەران عوسمان ئەوەشی خستۆتەڕوو، لە ماوەی 48 کاتژمێری رابردوودا توركیا 27 جار چەند ناوچەیەكی هەرێمی كوردستانی بۆردومانكردووە، لەمساڵیشدا 833 هێرشی ئەنجامداوە و بەوهۆیەوە هەشت هاووڵاتی شەهیدبوون.
شایەنی باسە، سەرەڕای هێرشەکانی تورکیا کە بۆ ماوەی چەندین ساڵ بەردەوامە، حکومەتی هەرێمی کوردستان و هیچ لایەنێکی ئەمنی و حکومی ئەم هێرشانەی سەرکۆنە نەکرد سەرەڕای ئەوەی بووە هۆی کوژرانی دەیان هاوڵاتی سڤیلی هەرێمی کوردستان و چەند ئەفسەرێکی کۆماندۆ و پێشمەرگە.