ئەمرۆ یەکشەممە، (26ـی ئایاری 2024)، كۆمیته‌ی ناوه‌ندیی پارتی دیموكراتی كوردستان بە سەرۆکایەتی مەسعود بارزانی سەرۆکی حزبەکە، کۆبووەوە و دوای کۆبوونەوەکەیش ڕاگەیەندراوێکی بڵاوکردەوە.
لە ڕاگەیەندراوی کۆمیتەی ناوەندیی پارتیدا هاتووە، کە ڕەوتی ئاساییکردنەوەی پەیوەندییەکانیان لەگەڵ ئێران ئاکامی هەبووە و پەیوەندییەکانیشیان لەگەڵ تورکیا ڕێڕەوی ئاسایی خۆی وەرگرتووە.
سەبارەت بە هەڵبژاردنی پەرلەمانی کوردستان، کۆمیتەی ناوەندیی پارتی ئاماژەی بەوەکردووە، لە هەوڵەکانیان لەگەڵ لایەنەکان بە گشتیی بۆ چارەسەریی کۆی کێشەکان بەردەوامە و دوای ئەوەی چارەسەریی کێشەکانی کە لە هەڵوێستی ڕاگەیاندراوماندا باس کراون بکرێن و ڕێککارەکان لە بەرژەوەندی خەڵکی کوردستان دابن و هەڵبژاردنەکە ببێتە هەڵبژاردنێکی گەل پەسند، هەڵوێستی خۆمان ڕادەگەیەنین.