وەزارەتی کۆچ و کۆچبەرانی عێراق رایگەیاند، دەست بە دابەشکردنی هاوکاری دارایی بەسەر ئەو خێزانە ئاوارانەدا کراوە کە گەڕاونەتەوە ناوچەکانی خۆیان و لە ئێستادا زیاتر لە ١٠٠ خێزان هاوکاری داراییان بە بڕی چوار ملیۆن دینار بەسەردا دابەش کراوە.
وەزارەتی کۆچ و کۆچبەرانی عێراق رایگەیاند، لەژێر رێنماییەکانی سەرۆک وەزیرانی عێراق، لیژنەی دابەشکردنی پارەی نەختینەیی، هاوکاری دارایی بەسەر ١٠٢ خێزاندا دابەش کرد.
ئاماژەی بەوەش کرد، هاوکارییەکە بڕی چوار ملیۆن دینار بوو بۆ هەر خێزانێک لەو ئاوارانەی کە لە ماوەی رابردوودا گەڕانەوە ناوچەکانی خۆیان لە شنگال و نەینەوا.

ئەوەشی خستە روو، پێدانی هاوکاری دارایی بۆ ئەو خێزانانە بەمەبەستی هاندانیانە بۆ ئەوەی پێش بەرواری داخستنی سەرجەم کەمپەکان بگەڕێنەوە ناوچەکانی خۆیان.