ڕاوێژکارێکی حکومەت خەرجی مانگانەی مووچە و میکانیزمی خەرجییەکان لە ساڵی ٢٠٢٦ ئاشکرا دەکات

21:56 2026-02-05 55181 ئابوری 0

2026-02-05

55181

ڕاوێژکاری دارایی سەرۆک وەزیران، مەزهەر محەمەد ساڵح، ئەمڕۆ پێنجشەممە جەختی کردەوە کە خەرجییەکانی حکومەت بەپێی یاسای (١/١٢) بەردەوامە تا ئەو کاتەی یاسای بودجەی ساڵی ٢٠٢٦ پەسەند دەکرێت، ئاماژەی بەوەش کرد کە کۆی مووچەی مانگانەی فەرمانبەران و خانەنشینان و چاودێری کۆمەڵایەتی دەگاتە ٨ ترلیۆن دینار.

ساڵح لەلێدوانێکی ڕۆژنامەوانییدا کەموتەڵع بەدواداچوونی بۆ کردووە ڕایگەیاند: سیاسەتی دارایی لە مانگی دووەمی ئەمساڵ ٢٠٢٦ەوە ئەرکەکانی خۆی بەپێی بڕگەکانی یاسای بەڕێوەبردنی دارایی فیدراڵی ژمارە (٦)ی ساڵی ٢٠١٩ی هەموارکراو ئەنجام دەدات، ئەویش لە ڕێگەی خەرجکردنی ڕێژەی (١/١٢) لە تێکڕای خەرجییە گشتییە کارگێڕییە ڕاستەقینەکانی ساڵی ٢٠٢٥. ئاماژەی بەوەش کرد کە دارایی گشتی سوود لە بڕگەی (٢٩)ی یاسای ناوبراو وەردەگرێت، کە ڕێگە بە دەسەڵاتی دارایی دەدات میکانیزمەکانی دابینکردنی دارایی کاتی و بەڕێوەبردنی نەختینە پەیڕەو بکات، لە حاڵەتێکدا ئەگەر نەتوانرێت خەرجییەکان بەپێی بودجەی ئاسایی کە بە یاسا ڕێکخراوە ئەنجام بدرێت.

وتیشی: ئەو بڕگانەی سەرەوە جەخت لە بنەمای دابینکردنی دارایی کاتی دەکەنەوە لە کاتی دواکەوتنی پەسەندکردنی یاسای بودجە یان ڕوودانی کەمیی کاتی لەو نەختینەیەی بۆ خەرجییەکان پێویستە، ئەمەش ڕێگە بە وەزارەتی دارایی دەدات ڕێوشوێنی دارایی کاتی بگرێتەبەر بۆ گەرەنتی بەردەوامی خەرجکردنی ئەو بڕە پارانەی لە پێشینەی کارەکاندان بەبێ دواکەوتن، کە لە سەرووی هەموویانەوە مووچەی فەرمانبەران، کرێ، مووچەی خانەنشینی و تەرخانکراوەکانی چاودێری کۆمەڵایەتییە، کە مانگانە بە نزیکەی هەشت ترلیۆن دینار دەخەمڵێندرێن.

سەبارەت بە ئەگەری دەرکردنی یاسای بودجە لە حاڵەتی دواکەوتنی هەڵبژاردنی سەرۆک کۆمار، ساڵح ڕوونی کردەوە: ئەمە حاڵەتێکی دەگمەنە، بەڵام لەوانەیە بەهۆی بەرژەوەندی باڵای نیشتمانییەوە بسەپێندرێت، بەتایبەت کە ئەنجومەنی نوێنەران لایەنی دەستووریی تایبەتمەندە بە دەرکردنی یاسای بودجە. لەم چوارچێوەیەدا، دەکرێت سەیری ئەگەری دەرکردنی یاسای بودجەی ساڵی ٢٠٢٦ بکرێت دوای وەرگرتنی ڕای دادگای باڵای فیدراڵی وەک دادگایەکی دەستووری تایبەتمەند بە یەکلاکردنەوەی کێشەکانی خولەکانی پەرلەمان، بەتایبەتی لە حاڵەتی غیابی تەواوی سەرۆک کۆماردا.

ئاماژەی بەوەش کرد، سەرۆک کۆمار، عەبدولەتیف جەمال ڕەشید، و سەرۆک وەزیران، محەمەد شیاع سودانی، تا ئەم ساتە لە پێگەی بەرپرسیارێتی یاسایی خۆیاندان، ئەمەش لە ڕووی بنەماییەوە ڕێگە دەدات داوای ئامادەکردنی ڕەشنووسی یاسای بودجەی گشتی فیدراڵی بکرێت و پێشکەش بە ئەنجومەنی نوێنەران بکرێت بۆ دەستپێکردنی ڕێکارە یاساییەکان، ئەگەر دەسەڵاتی یاسادانانی هەڵبژێردراو ئارەزووی ئەوە بکات