کوردستان.. سبەی شەو باران دەبارێت ‏ ‏

23:23 2025-09-24 43341 كوردستان 0

2025-09-24

43341

ئەمڕۆ چوارشەممە، شارەزایەکی بواری کەشناسی رایگەیاند، سبەی شەو لە چەند ناوچەیەک ئەگەری بارانبارین هەیە.
‏
‏ئاراس جەبار، شارەزای بواری کەشناسی بڵاویکردەوە، لە سبەی پێنجشەممەوە پێشبینیدەکرێت پلەی گەرمی بەراورد بە رۆژانی رابردوو، بە رێژەی 3 تا 4 پلە بەرزببێتەوە.
‏
‏ئاماژەی بەوەشکرد، سبەی لە کاتەکانی نیوەڕۆوە نزمە پاڵەپەستۆیەکی لاواز لە رۆژهەڵاتی دەریای ناوەڕاستەوە روو لە ناوچەکانی سوریا، رۆژئاوای عێراق و هەرێمی کوردستان دەکات و ئەگەری دروستبوونی ناجێگیرییەکی لاواز لە بەرگەهەوای ناوچەکەدا دەبێت، بەتایبەت لە کاتەکانی ئێوارەوە بۆ شەو، ئاسمانی هەرێم بە زۆری دەگۆڕێت بۆ پەڵەهەور و نیمچەهەور.
‏
‏ووتیشی، لە هەندێک شوێنی سنووری پارێزگای نەینەوا، هەولێر و ئیدارەی سۆران، ئەگەر هەیە هەندێک کات بارانێکی کەم ببارێت لەگەڵ چالاکبوونی هەورەبروسکە؛ بەگشتی بڕی بارانەکە کەم دەبێت و لە هەموو شوێنێکدا نابارێت، کاریگەرییشی لەسەر ناوچەکانی دیکەی هەرێمی کوردستان نابێت. لە درەنگانی شەودا، ئەو حاڵەتە ناجێگیرە لە بەرگەهەوای ناوچەکەدا لاوازتر دەبێت و ئەگەری بارانبارین نامێنێت.
‏
‏ئەو شارەزایە پێشبینیشدەکات، تاوەکو ئێوارەی رۆژی هەینی، ئاسمانی ناوچەکە ناوبەناو پەڵەهەوری تێدا دروستببێت و هەندێک کاتیش نیمچەهەور دەبێت، پاشان کاریگەرییەکەی کۆتایی پێدێت.
‏
‏ئەوەشی خستووەتەڕوو، لە کۆتاییەکانی ئەم مانگە بۆ سەرەتای مانگی داهاتووش، بارستەهەوایەکی سارد زۆربەی وڵاتانی ناوچەکە دەگرێتەوە، کە لەوکاتەدا، ئەگەری بارانێکی مامناوەندیش بۆ ناوچە شاخاوییەکانی سنووری ئیدارەی سۆران و باکووری هەرێم، هەیە.