ڕاوێژکارێتی ئاسایشی نیشتمانی: حکومەت کار لەسەر گەڕاندنەوەی ئەو داعشانە دەکات کە لە سوریاوە گواستراونەتەوە بۆ وڵاتانی خۆیان

20:17 2026-02-22 39552 عێراق 0

2026-02-22

39552

ئەمڕۆ یەکشەممە، ڕاوێژکارێکی ئاسایشی نیشتیمانی،سەرکەوتنی پرۆسەی گواستنەوەی چەکدارانی داعشی لە سووریاوە بەبێ هیچ هەڵەیەک ڕاگەیاند، هاوکات جەختی کردەوە کە مانەوەی ئەوان هەمیشەیی نییە و دەگەڕێندرێنەوە بۆ وڵاتەکانی خۆیان.
"سەعید جیاشی"ڕاوێژکاری کاروباری ستراتیژی لە ئاسایشی نیشتیمانی لەلێدوانێکدا کەموتەڵع بەدواداچوونی بۆ کردووە ڕایگەیاند: بابەتی گواستنەوەی زیندانیانی داعش لەسەر داوای ئاسایشی نیشتیمانی بووە، چونکە بارودۆخێکی نائاسایی لە سووریا هاتە ئاراوە و زیندانەکان تووشی شڵەژان بوون،هەندێک لە زیندانییان ڕایانکرد، بۆیە پێویست بوو بەو ژمارەیەی کە بە فەرمی ڕاگەیەندراوە بگوازرێنەوە بۆ عێراق و لە زیندانە توندوتۆڵەکاندا دابنرێن.
وتیشی: عێراق سەرجەم ئامادەکارییە ئەمنییەکانی بە بەشداری سەرجەم دەزگا ئەمنییەکان و بەدواداچوونی ئەنجومەنی باڵای دادوەری ئەنجامداوە،و گواستنەوەکە لەژێر چاودێری دەزگای دژە تیرۆردا بووە و کارەکان بە سەرکەوتوویی و بەبێ هیچ هەڵەیەک کۆتاییان هاتووە.
ئاماژەی بەوەشکرد : ڕاوێژکاریی ئاسایشی نیشتیمانی لە پێنج ساڵی ڕابردوودا هۆشداری دابوو لەوەی زیندانەکانی سووریا هەڕەشەن بۆ سەر ئاسایشی عێراق.
لە درێژەی قسەکانیدا وتی: بوونی زیندانیانی داعش لە عێراق و لەژێر کۆنترۆڵی دەزگا ئەمنییەکان و ئیدارەی دەسەڵاتی دادوەری عێراق باشترە،و مامەڵەکردن لەگەڵیان بەم شێوەیە باشترە وەک لەوەی لە ژینگەیەکی کراوە و بێسەروبەردا بن.
ڕوونیشیکردەوە : مانەوەی زیندانیانی داعش لە عێراق هەمیشەیی نییە،و حکومەت کار لەسەر گەڕانەوەیان بۆ وڵاتەکانیان دەکات،و سەرجەم ئەو کەسانەی گەیشتوونەتە عێراق سەر بە زیاتر لە 67 دەوڵەتی جیاوازن.