پەرلەمانتارێک: داواکاری خەڵکی سلێمانیمان گەیاندە ئەردۆغان سەبارەت بە هەڵگرتنی سزاکانی سەر فرۆکەخانەی نێودەوڵەتی سلێمانی

23:04 2025-07-01 66745 كوردستان 0

2025-07-01

66745

كاروان یاروەیس، ئەندامی پەرلەمانی عێراق ڕایگەیاند، داواکاری خەڵکی سلێمانیمان گەیاندە سەرۆکی تورکیا سەبارەت بە هەڵگرتنی سزاکانی سەر فرۆکەخانەی نێودەوڵەتی سلێمانی و ئەویش رایگەیاند، وەزیرە پەیوەندارەکان و تیمەکەی رادەسپێرێت بۆ پەیوەندیکردن لەگەڵ قوباد تاڵەبانی، جێگری سەرۆکی حکومەتی هەرێم بۆ ئەوەی هەڵسەنگاندنی خۆیان بدەن.
‏
‏ئەمڕۆ سێشەممە، كاروان یاروەیس، لە ڕایگەیەندراوێكدا بڵاویكردەوە، کۆبونەوەمان وەکو شاندی پەرلەمانی عێراق بە سەرۆکایەتی مەحمود مەشهەدانی لەگەڵ رەجەب تەیب ئەردۆگان، سەرۆکی تورکیا کۆتاییهات.
‏
‏ئاماژەی بەوەشكرد، لەکۆبونەوەکەدا جەختمکردەوە سەرکەوتنی پرۆسەی ئاشتی لەتورکیا و چارەسەری ئاشتیانەی پرسی کورد سیاسەتی لەمێژینەی مام جەلال-ە و داوامان کرد هەنگاو و قۆناغەکانی بەسەرکەوتوی تەواوبکرێت.
‏
‏بەگوێرەی ڕاگەیەندراوەكە، داواکاری خەڵکی سلێمانیمان گەیاند سەبارەت بە هەڵگرتنی سزاکانی سەر فرۆکەخانەی نێودەوڵەتی سلێمانی و ئەویش رایگەیاند، وەزیرە پەیوەندارەکان و تیمەکەی رادەسپێرێت بۆ پەیوەندیکردن لەگەڵ قوباد تاڵەبانی، جێگری سەرۆکی حکومەتی هەرێم و هەڵسەنگاندنی خۆیان بدەن بەمن.
‏
‏ئەوەشیخستەڕو، سەبارەت بە کێشەکانی نێوان حکومەتی هەرێم و حکومەتی فیدرالی، سەرۆک کۆماری تورکیا رایگەیاند، بەلای ئێمەوە گرنگە هەردولا کێشەکانیان چارەسەر بکەن.
‏
‏سەبارەت بەکێشەی ئاو و وشکەساڵی، سەرۆک کۆماری تورکیا بڕیاریدا سەرلەبەیانی سبەینێ بڕی 420 مەتر سێجا لە چرکەیەکدا (320 دجلە و 100 فورات) ئاو بۆ عێراق بەربدەنەوە.