وەزیری پێشمەرگە و بەرپرسێکی ئەمنی بەریتانیا تاوتوێی پرۆسه‌ی چاكسازی هێزەکانی پێشمەرگەیان كرد ‏

00:07 2025-07-31 45204 كوردستان 0

2025-07-31

45204

وه‌زیری پێشمه‌رگه‌ی حكومه‌تی هه‌رێم له‌دیدارێكدا له‌گه‌ڵ شاندێكی باڵای بریتانیا "تاوتوێی پرۆسه‌ی چاكسازی هێزەکانی پێشمەرگەیان كرد".
‏
‏لە راگه‌یه‌ندراوێكی وه‌زاره‌تی پێشمه‌رگه‌دا هاتووە، ئه‌مڕۆ شۆڕش ئیسماعیل وه‌زیری پێشمه‌رگه‌ پێشوازی له‌ ئه‌دمیراڵ ئێدوارد ئاڵگرین راوێژكاری باڵای وه‌زاره‌تی به‌رگری شانشینی بریتانیا بۆ كاروباری رۆژهه‌ڵاتی ناوه‌ڕاست و باكوری ئه‌فریقا، ئاندرۆ بیزلی كونسوڵی گشتیی بریتانیا له‌ هه‌رێمی كوردستان، شاندێكی سه‌ربازی یاوه‌ریان كرد.
‏له‌و كۆبونه‌وه‌یه‌دا، وه‌زیری پێشمه‌رگه‌ و گه‌وره‌ ڕاوێژكاری بریتانیا باسیان له‌ دۆخی گشتیی هه‌رێمی كوردستان و عێراق و ناوچه‌كه‌ كرد، به‌ تایبه‌تی هێزی پێشمه‌رگه‌ی كوردستان و ده‌رئه‌نجامه‌كانی پرۆسه‌ی چاكسازی و ئه‌و سه‌قامگیریه‌ی له‌ سایه‌ی پێشمه‌رگه‌وه‌ به‌ده‌ستهاتوه‌.
‏
‏وه‌زیری پێشمه‌رگه‌ ستایشی ڕۆڵی باڵای بریتانیای كرد به‌ تایبه‌ت له‌ هاوكاری و پاڵپشتی هێزی پێشمه‌رگه‌ی كوردستان رایگه‌یاند، "بریتانیا له‌ گشت قۆناغه‌ جیاجیاكاندا پاڵپشتی گه‌لی كوردستان و هێزی پێشمه‌رگه‌ی كوردستان بوه‌، به‌ تایبه‌ت له‌ تێكشكاندنی داعش، مه‌شق و راهێنان و ڕاوێژدان به‌ هێزی پێشمه‌رگه‌، پاڵپشتیكردنی له‌ ڕوی لۆجیستیه‌وه‌"، بۆ ئه‌مه‌ش، وه‌زیری پێشمه‌رگه‌ سوپاسی ڕۆڵی باڵای كونسوڵی گشتیی، ئه‌فسه‌رانی باڵا، راوێژكارانی به‌رگری، و سه‌ربازانی بریتانیای كرد له‌ هه‌رێمی كوردستان كه‌ به‌رده‌وام هاوكاریانن.
‏
‏له‌لای خۆیه‌وه‌، ئه‌دمیراڵ ئاڵگرین جه‌ختی له‌ به‌رده‌وامی په‌یوه‌ندییه‌كان و پاڵپشتی و پشتیوانی بریتانیا بۆ هێزی پێشمه‌رگه‌ كرده‌وه‌، به‌ تایبه‌ت له‌ سه‌رخستنی پرۆسه‌ی چاكسازی، راشیگه‌یاند، "هێزی پێشمه‌رگه‌ پارێزه‌ری ئارامی و ئاسایشی ناوچه‌كه‌یه‌ و ده‌ستكه‌وتی مه‌زنی به‌ده‌ستهێناوه‌، دڵنیاتان ده‌كه‌ینه‌وه‌ بریتانیا له‌ هه‌رێمی كوردستان ده‌مێنێته‌وه‌ و پشتیوانتان ده‌بین".