ئەمڕۆ دووشەممە ،جێگری سەرۆکی ئەنجومەنی وەزیران و وەزیری دەرەوە، فوئاد حوسێن کارنامەی باڵیۆزی کۆریای باشوور و بەنگلادیش لە عێراقی وەرگرت.
‏لە ڕاگەیەندراوێکی وەزارەتی دەرەوەدا هاتووە: "جێگری سەرۆکی ئەنجومەنی وەزیران و وەزیری دەرەوە، فوئاد حوسێن کۆپییەکی بڕوانامەی باڵیۆزی نوێی کۆماری کۆریای باشوور لە کۆماری عێراق، لی جون ئیل، لە میانی کۆبوونەوەیەکی فەرمیدا کە لە بینای وەزارەتی دەرەوە لە بەغدا بەڕێوەچوو، وەرگرت".
‏لە بەیاننامەکەدا ئاماژە بەوەشکراوە، "لە میانی کۆبوونەوەکەدا، حوسێن بەخێرهاتنی باڵیۆزی کۆریای باشووری کرد"، هیوای "سەرکەوتنی بۆ خواست لە جێبەجێکردنی ئەرکەکانی"، هەروەها جەختی لەسەر "پەرۆشی حکومەتی عێراق کردەوە بۆ پتەوکردنی پەیوەندییە دووقۆڵییەکانی نێوان بەغدا و سیئۆل و پێشخستنی بەرەو ئاسۆی فراوانتر لە بوارە جیاجیاکاندا، بەتایبەتی لە بوارەکانی وەبەرهێنان، وزە، پەروەردە و تەکنەلۆژیا".
‏لای خۆیەوە باڵیۆز لی جون ئیل "دڵخۆشی خۆی بە نوێنەرایەتیکردنی وڵاتەکەی لە عێراق" دەربڕی و ستایشی "پێشکەوتنی بەرچاوی پەیوەندییەکانی نێوان هەردوو وڵات"ی کرد، هەروەها "پابەندبوونی کۆریای باشوور بۆ بەردەوامبوون لە پاڵپشتیکردنی هەوڵەکانی پەرەپێدان و سەقامگیری لە عێراق و بەهێزکردنی هاوکارییە دووقۆڵییەکان بۆ خزمەتکردنی بەرژەوەندییە هاوبەشەکان" دووپاتکردەوە.
‏ڕوونیشی کردەوە کە "هەروەها لە کۆبوونەوەکەدا کۆمەڵێک بابەتی بەرژەوەندی هاوبەش و ڕێگاکانی پەرەپێدانی میکانیزمی هاریکاریی دوولایەنە لە کۆڕبەندە نێودەوڵەتییەکان تاوتوێ کرا".
‏لەبەیاننامەیەکی تری وەزارەتدا هاتتوە : "هەر ئەمڕۆ دووشەممە، جێگری سەرۆکی ئەنجومەنی وەزیران و وەزیری دەرەوە، فوئاد حوسێن، کۆپییەکی بڕوانامەی باڵیۆزی نوێی کۆماری گەلی بەنگلادیش لە کۆماری عێراق، ئەمدی مەقسودول حەق، لە میانی دیدارەکەی لەگەڵیدا لە باڵەخانەی وەزارەتی دەرەوە لە بەغدا وەرگرت".
‏حوسێن بەخێرهاتنی باڵیۆزی بەنگلادیشی کرد و هیوای "سەرکەوتنی لە ئەرکەکانیدا"ی بۆ خواست و "ئامادەیی وەزارەتی دەرەوە بۆ پێشکەشکردنی پاڵپشتی پێویست بۆ سەرکەوتنی ئەرکەکەی دووپاتکردەوە، کە یارمەتیدەر دەبێت لە پتەوکردنی پەیوەندییە دووقۆڵییەکانی نێوان هەردوو وڵاتی دۆست لە بوارە جیاجیاکاندا".
‏لای خۆیەوە باڵیۆز ئەمدی مەقسودول حەق "سوپاس و پێزانینی خۆی بۆ ئەو پێشوازییە گەرمە دەربڕی"،و جەختی لەسەر "پەرۆشی وڵاتەکەی بۆ پەرەپێدانی پەیوەندییەکانی لەگەڵ عێراق و قووڵکردنەوەی هاریکاری هاوبەش لە بوارەکانی سیاسی، ئابووری و کولتووری" کردەوە.
‏ناوبراو درێژەی بە قسەکانی دا و وتی: "لە میانەی کۆبوونەوەکەدا باسیان لە ڕێگاکانی بەرزکردنەوەی هاوکاریی دوو قۆڵی کرد و بیروڕایان ئاڵوگۆڕ کرد لەسەر کۆمەڵێک بابەتی جێی بایەخی هاوبەش لەسەر ئاستی ناوچەیی و نێودەوڵەتی".