وەزارەتی كۆچ داخستنی دووەم كەمپی ئاوارەكانی لە هەرێم ڕاگەیاند

19:14 2023-12-14 28307 عێراق 0

2023-12-14

28307

ئەمڕۆ پێنجشەممە، ئیڤان فایق جابرۆ وەزیری كۆچ و كۆچبەران، داخستنی دووەم كەمپی ئاوارەكانی لە هەرێمی كوردستان ڕاگەیاند. وەزارەتی كۆچ و كۆچبەران لە بەیاننامەیەكدا رایگەیاند: لە چوارچێوەی رێنماییەكانی سەرۆكی ئەنجومەنی وەزیران محەمەد شیاع سودانی، بۆ كۆتاییهێنان بە دۆسیەی ئاوارەبوون لە وڵاتدا،و جێبەجێكردنی پلانی نیشتمانی بۆ گەڕانەوەی ئاوارەكان و تێكەڵكردنیان بە كۆمەڵگە، وەزیری كۆچ و كۆچبەران ئیڤان فایق جابرۆ، داخستنی كەمپی عەربەتی لە پارێزگای سلێمانی ڕاگەیاند. ئاماژەی بەوەشكرد: كەمپەكە دووەم كەمپە لە هەرێمی كوردستان لە دوای كۆچكردنی ساڵی 2014 داخراوە، دوای ئەوەی دوایین گروپی (170) ئاوارە گەڕێندرانەوە ناوچەكانی خۆیان لە پارێزگای سەڵاحەدین. هەر لە بەیاننامەكەدا هاتووە، جابرۆ سوپاس و پێزانینی خۆی ئاراستەی حكومەتی خۆجێیی لە پارێزگای سلێمانی كرد بۆ هاوكارییە گەورەكانی لە جێبەجێكردنی پلانی حكومەتی فیدراڵی بۆ ئاسانكاری بۆ گەڕانەوەی ئاوارەكان بۆ سەر ماڵ و حاڵی خۆیان و داخستنی كەمپەكان، دوای هەوڵە زۆر باشەكانی حكومەت لە بوارەكانی گەڕانەوە بۆ دابینكردنی ژیانێكی شیاو بۆ خێزانە گەڕاوەكان و گرتنەخۆی لە پرۆژەكانی بەرهەمهێنانی داهات، داواشی كرد، حكومەتە خۆجێیەكان لە هەولێر و دهۆك نموونەی سلێمانی لەبەرچاوبگرن بۆ ئاسانكاری بۆ گەڕانەوەی ئاوارەكان بۆ ناوچەكانیان بەگوێرەی پلانی حكومەت بە ئامانجی كۆتاییهێنان بە ئاوارەبوون و داخستنی كەمپەكان.