واشنتۆن: بڕیاری ئێران بۆ ڕاگرتنی هاوکارییەکانی لەگەڵ ئاژانسی نێودەوڵەتی وزەی ئەتۆم جێگای قبوڵکردن نییە ‏

23:57 2025-07-02 81220 عەرەبی و نێودەوڵەتی 0

2025-07-02

81220

ئەمریکا ئەمڕۆ چوارشەممە ،ناڕەزایی توندی خۆی لە بڕیارەکەی ئێران بۆ ڕاگرتنی هاوکارییەکانی لەگەڵ ئاژانسی نێودەوڵەتی وزەی ئەتۆمی دەربڕی و بە "ناقبوڵکراو" وەسفی کرد، بە لەبەرچاوگرتنی ئەوەی کە واشنتۆن بە دەرفەتێک دەزانێت بۆ تاران بۆ گۆڕینی ڕێڕەو و هەڵبژاردنی ڕێگای ئاشتی و سەقامگیری.
‏
‏تامی بروس وتەبێژی وەزارەتی دەرەوەی ئەمریکا لە کۆنگرەیەکی ڕۆژنامەوانیدا وتی: ئێمە دەستەواژەی 'قبووڵنەکراو' بەکاردەهێنین بۆ وەسفکردنی هەڵبژاردنی ئێران بۆ ڕاگرتنی هاوکاری لەگەڵ ئاژانسی نێودەوڵەتی وزەی ئەتۆم لە کاتێکدا کە هێشتا دەرفەتی ئەوەی هەیە ڕێڕەو بگۆڕێت و ڕێگەی ئاشتی و خۆشگوزەرانی هەڵبژێرێت.
‏
‏بروس جەختی لەوە کردەوە کە "ئێران دەبێ بە تەواوی و دەستبەجێ هاوکاری و پەیوەندیەکانی لەگەڵ ئاژانسەکە دووبارە بکاتەوە".
‏
‏لە بەیاننامەیەکدا کە لەلایەن وەزارەتی دەرەوەی ئەمریکاوە بڵاوکراوەتەوە، واشنتۆن جەختی لەسەر چەند خاڵێکی سەرەکی کردەوە:
‏
‏بڕیاری ئێران بۆ ڕاگرتنی هاوکارییەکانی لەگەڵ ئاژانسی نێودەوڵەتی وزەی ئەتۆمی "قبووڵ ناکرێت".
‏
‏ئێران دەبێت بێ دواکەوتن بە تەواوی هاوکاری ئاژانسی وزەی ئەتۆمی بکات.
‏
‏تاران دەبێ پابەند بێت بە ڕێککەوتنی پارێزبەندی کە لە پەیماننامەی قەدەغەکردنی بڵاوبوونەوەی چەکی ئەتۆمیدا هاتووە.
‏
‏ئاژانسی نێودەوڵەتی وزەی ئەتۆمی دەبێ دەستڕاگەیشتنێکی بێ سنوور بە دامەزراوەکانی پیتاندنی یۆرانیۆمی ئێران کە لەم دواییانەدا ڕاگەیەندراوە، پێبدرێت.
‏
‏لە هیچ بارودۆخێکدا ڕێگە بە ئێران نادرێت خاوەنی چەکی ئەتۆمی بێت.
‏
‏ئێران دەبێ زانیاری تەواو و شەفاف سەبارەت بە کەرەستە ئەتۆمییە ڕانەگەیەندراوەکانی بدات.
‏
‏ئەم لێدوانانەی ئەمریکا لە کاتێکدایە کە نیگەرانییە نێودەوڵەتییەکان سەبارەت بە بەرنامە ئەتۆمییەکەی ئێران پەرەی سەندووە و گرژییەکانی نێوان تاران و ئاژانسی نێودەوڵەتی وزەی ئەتۆمی نوێبووەتەوە، دوای ئەوەی چەندین خولی پێشووی دانوستانەکان شکستیان هێنا.