هەڤاڵ ئەبوبەکر: خۆتان بۆ ڕێکخستنەوەو یەکخستنەوەی ناوماڵی کوردو خاکی کوردستان ئامادەبکەن

13:07 2024-10-15 107089 كوردستان 0

2024-10-15

107089

د. هەڤاڵ ئەبوبەکر، پارێزگاری سلێمانی و سەرۆکی لیژنەی ئارامیی پارێزگای سلێمانی لەگەڵ کۆتایی ھاتنی کۆتا ڕۆژی بانگەشەی هەڵبژاردنی پەرلەمانی کوردستان ڕایگەیاند، ئەمڕۆ لەگەڵ کۆتایهاتنی دەوامی فەرمیدا، وەرگرتنەوەی کارتی بایۆمەتری دەنگدانیش ڕادەگیرێت، داوا لە هەموو ئەو بەڕێزانە دەکەین کە خۆیان تۆمارکردووە سەردانی ناوەندەکان بکەن بۆ وەرگرتنەوەی کارتەکانیان، داوا لە هەموو ئەو ئازیزانەیش دەکەین کە مافی دەنگدانیان هەیە؛ بەشدارییەکی کارا لە ڕۆژی هەڵبژاردندا بکەن و بەرجەستەی مافی ڕاستەقینەی خۆیان بکەن، دڵنیابن لەوەی هەڵبژاردن ڕەوایەتیی بنەڕەتیی بەهەر دەسەڵات و حکومڕانییەک دەدات، هیچ شتێک ناگۆڕێت ئەگەر ڕێژەو قەبارەو ڕیزبەندیی لایەنە بەشداربووەکان نەگۆڕێت، ئەمەش بەبێ بەشداریی کارایانەی ئێوە ناکرێت.
هەڤاڵ ئەبوبەکر دەشڵێت: هەر ئەمڕۆ لە سەعات دوانزدەی شەودا ماوەی بانگەشەی هەڵبژاردنەکان تەواودەبێت، داوا لە هەموو کاندیدو لایەن و قەوارەو هاوپەیمانێتییە بەشداربووەکان دەکەین، بە ئارامیی و بە گیانی بەرزی قبوڵکردنی یەکتریی بانگەشەکەیان تەواو بکەن، پشتیوانمان بن بۆ ئەوەی ئەو زەمینە پێویست و لەبارەی بۆ هەڵبژاردنە تایبەت و گشتییەکان فەراهەممان کردووە، ببێتە وێستگەی چەسپاندنی دیموکراسیی و بەهێزکردنی قەوارەی هەرێمی کوردستان و سەرخستنی خەڵکی کوردستان و دەرفەتبەخشین بە پەسەندکردنی ئەنجامەکان و پێکهێنانی پەرلەمان و حکومەتێکی نوێ.
لە ئێستاوە خۆتان بۆ ڕێکخستنەوەو یەکخستنەوەی ناوماڵی کوردو خاکی پیرۆزی کوردستان ئامادەبکەن، بۆ ئەوەی تاڵی باریکی هەودای یەکبونی نیشتمانیی؛ نەپسێت، لە لوتکەوە نەکەوینەوە ناو قوڵایی بنی چاڵە تاریکەکانی شکست.
سوپاس بۆ هەموو لایەک کە تائاستێکی باش؛ پابەندیی یاساو بڕیارو ڕێنماییەکانی هەڵبژاردن بوون، قۆناغێکی گرنگتان لە بەرەوپێشچوونی هۆشیاریی گشتیدا بڕی.