هێزی ئاسمانیی عێراق "حەشارگە"ی داعش لە نەینەوا بۆردوومان دەکات

21:18 2026-02-06 37470 عێراق 0

2026-02-06

37470

فڕۆکە جەنگییەکانی عێراق دوو "مۆڵگەی داعش" لە پارێزگای نەینەوا بۆردومان دەکەن و چوار چەکدار دەکوژن. بەڕێوەبەری راگەیاندنی هەواڵگریی سەربازی دەڵێ: "چەکدارەکان لەنێو حەشارگەکاندا بوون."

عەقید حەیدەر محەمەداوی، بەڕێوەبەری راگەیاندنی هەواڵگریی سەربازیی عێراق، رۆژی هەینی، 6ـی شوباتی 2026، بە تۆڕی میدیایی رووداوی راگەیاند: "لەسەر بنەمای زانیاریی هەواڵگریی سەربازی، فڕۆکە جەنگییەکانی F-16ی عێراقی چەند هێرشێکی ئاسمانییان بۆ سەر دوو مۆڵگە لە بیابانی رۆژئاوای نەینەوا ئەنجامدا."

بە گوتەی عەقید حەیدەر محەمەداوی، ئەو دوو مۆڵگەیە نزیکن لە سنووری پارێزگای سەڵاحەدین و لە کاتی هێرشە ئاسمانییەکەیشدا داعشەکان لەوێ بوون.

شانەی راگەیاندنی ئەمنیی عێراقیش لە راگەیێندراوێکدا کوژرانی 4 ئەندامی داعشی لە ئەنجامی ئەو هێرشە ئاسمانییەدا راگەیاند.

لە راگەیێندراوەکەی شانەی راگەیاندنی ئەمنیدا هاتووە: "لە بەردەوامی کاری هێزە ئەمنییەکان بۆ راوەدوونانی پاشماوەکانی داعش و لەسەر بنەمای زانیارییەکی وردی هەواڵگریی سەربازی کە چەند رۆژێکی خایاند، فڕۆکە جەنگییەکانی جۆری 16F- هێرشێکی ئاسمانییان ئەنجامدا."

لە بەیاننامەکەدا هاتووە، هێرشەکە دوو مۆڵگەی چەکدارانی داعش و ئۆتۆمبێلێکی لە بیابانی رۆژئاوای نەینەوا لە نزیک ناوچەی حەزەر کردە ئامانج.

بەپێی راگەیێندراوەکە، بۆردوومانەکە بووەتەهۆی کوژرانی هەر 4 چەکدارەکە و تێکشکاندنی ئەو کەلوپەلە لۆجیستی و تەقەمەنییانەی لەنێو مۆڵگەکاندا بوون.