نه‌ته‌نیاهۆ فه‌رمانی كرد هێزه‌كانی حكومه‌تی سوریا له‌ سوه‌یدا بكرێنه‌ ئامانج

13:20 2025-07-15 83270 عەرەبی و نێودەوڵەتی 0

2025-07-15

83270

ئەمڕۆ سێشەممە،بنیامین نه‌ته‌نیاهۆ سه‌رۆك وه‌زیرانی ئیسرائیل رایگه‌یاند، له‌گه‌ڵ وه‌زیری به‌رگری وڵاته‌كه‌ی، فه‌رمانی هێرشكردنه‌ سه‌ر هێزه‌كانی سوریا و چه‌كه‌كانیانی كردوه‌ له‌ پارێزگای سوه‌یدا.
‏
‏بنیامین نه‌ته‌نیاهۆ له‌ لێدوانێكی هاوبه‌شدا له‌گه‌ڵ یسرائیل كاتز وه‌زیری به‌رگری ئیسرائیل بڵاویكرده‌وه‌، "هێنانه‌ ناوه‌وه‌ی چه‌ك بۆ ناو سوه‌یدا پێشێلكردنی سیاسه‌تی چه‌كداماڵینه‌ كه‌ پێشتر په‌سه‌ندكرابو".
‏
‏له‌لێدوانه‌ هاوبه‌شه‌كه‌دا باسیان له‌وه‌شكردوه‌، "ئیسرائیل پابه‌نده‌ به‌ ڕێگریكردن له‌ هه‌ر زیانێك به‌ دروزه‌كان له‌ سوریا، ئه‌مه‌ش له‌سه‌ر بنه‌مای هاوپه‌یمانی قوڵی برایه‌تی له‌گه‌ڵ هاوڵاتیانی دروزه‌كانمان له‌ ئیسرائیل".
‏
‏بنیامین نه‌تانیاهۆ و یسرائیل كاتز ئاشكرایانكردوه‌، "كارده‌كه‌ین بۆ ئه‌وه‌ی ڕژێمی سوریا نه‌توانێت دروزه‌كان بكاته‌ ئامانج و ده‌سته‌به‌ركردنی داماڵینی سه‌ربازیی له‌ناوچه‌ سنوره‌كانمان مسۆگه‌ر بكه‌ین".
‏
‏لای خۆیه‌وه‌، سوپای ئیسرائیل رایگه‌یاند، "به‌ ئاراسته‌ی سه‌ركردایه‌تی سیاسی، له‌م دواییانه‌دا ده‌ستمان كرد به‌ هێرشكردنه‌ سه‌ر ئۆتۆمبێله‌ سه‌ربازییه‌كانی سه‌ر به‌ هێزه‌كانی ڕژێمی سوریا له‌ سوه‌یدا له‌ باشوری سوریا".
‏
‏ئاماژه‌ی به‌وه‌شكرد، "هێرشمانكرده‌ سه‌ر ژماره‌یه‌ك زرێپۆش، له‌وانه‌ تانك و ئۆتۆمبێلی هه‌ڵگری سه‌ربازان و به‌ ئامانجی ڕێگریكردن له‌ چونه‌ ژوره‌وه‌یان بۆ سوه‌یدا".