مه‌سرور بارزانی: خوازیاری باشترین په‌یوه‌ندین له‌گه‌ڵ حكومه‌تی فیدڕاڵ

20:49 2025-10-14 25687 عێراق 0

2025-10-14

25687

مه‌سرور بارزانی سه‌رۆكی حكومه‌تی هه‌رێمی كوردستان رایگه‌یاند، "ئێمه‌ خوازیاری ئه‌وه‌ین باشترین په‌یوه‌ندیمان له‌گه‌ڵ حكومه‌تی فیدڕاڵ هه‌بێت له‌سه‌ر بنه‌مای ڕێزگرتن له‌ مافه‌ ده‌ستورییه‌كان و قه‌واره‌ی فیدراڵیی هه‌رێمی كوردستان و دابینكردنی به‌شه‌ بودجه‌ی تایبه‌ت به‌ هه‌رێم له‌ بودجه‌ی عێراق".

به‌گوێره‌ی راگه‌یه‌ندراوێكی فه‌رمانگه‌ی میدیا و زانیاری، ئه‌مڕۆ سێشه‌ممه‌ مه‌سرور بارزانی پێشوازی له‌ پاتریك دۆرێل باڵیۆزی فڕه‌نسا له‌ عێراق كرد، له‌ دیداره‌كه‌دا كه‌ یان برێم، كونسوڵی گشتیی فڕه‌نسا له‌ هه‌رێمی كوردستان ئاماده‌ی بو، دۆخی گشتیی عێراق و ناوچه‌كه‌ و چاره‌سه‌ركردنی كێشه‌كانی هه‌رێمی كوردستان و حكومه‌تی فیدڕاڵ تاوتوێ كرا.
له‌دیداره‌كه‌دا، مه‌سرور بارزانی رایگه‌یاندوه‌، "ئێمه‌ خوازیاری ئه‌وه‌ین باشترین په‌یوه‌ندیمان له‌گه‌ڵ حكومه‌تی فیدراڵ هه‌بێت له‌سه‌ر بنه‌مای ڕێزگرتن له‌ مافه‌ ده‌ستورییه‌كان و قه‌واره‌ی فیدراڵیی هه‌رێمی كوردستان و دابینكردنی به‌شه‌ بودجه‌ی تایبه‌ت به‌ هه‌رێم له‌ بودجه‌ی گشتیی عێراقدا".
وتیشی، "هیوادارین ڕێككه‌وتنی ئه‌م دواییه‌ی هه‌نارده‌كردنه‌وه‌ی نه‌وتی هه‌رێمی كوردستان، ببێته‌ ڕێخۆشكه‌ر بۆ چاره‌سه‌ركردنی كێشه‌كانی نێوان هه‌ردولا".

باڵیۆزی فڕه‌نسا ده‌ستخۆشی پڕۆژه‌ چاكسازییه‌كانی له‌ سه‌رۆكی حكومه‌ت كرد و ستایشی گرنگیدانی حكومه‌تی هه‌رێمی كوردستانی به‌ ئه‌نجامدانی پڕۆژه‌ی تایبه‌ت به‌ ژینگه‌پارێزی كرد، هه‌روه‌ها باسی له‌ سه‌ردانی چاوه‌ڕوانكراوی ئیمانوێل ماكڕۆنی سه‌رۆك كۆماری فڕه‌نسای بۆ عێراق و هه‌رێمی كوردستان له‌ مانگی (كانونی یه‌كه‌م/12)ی ئه‌مساڵدا كرد.

له‌ به‌شێكی دیكه‌ی دیداره‌كه‌دا، بیروڕا له‌باره‌ی هه‌وڵ و گفتوگۆكانی پێكهێنانی كابینه‌ی نوێی حكومه‌تی هه‌رێم و پرۆسه‌ی هه‌ڵبژاردنی ئه‌نجومه‌نی نوێنه‌رانی عێراق ئاڵوگۆڕ كرا.