كۆمسیۆن: پێژماردن و ڕێكاری یاسایی بەرامبەر ئەوانەی سەرپێچی دەكەن لە بێدەنگی هەڵبژاردن

11:30 2025-11-08 36263 عێراق 0

2025-11-08

36263

ئەمڕۆ شەممە كۆمسیۆنی باڵای سەربەخۆی هەڵبژاردنەكانی عێراق دووپاتی كردەوە كە ڕێكاری یاسایی بەرامبەر ئەو كەسانە دەگرنەبەر كە ماوەی بێدەنگی هەڵبژاردن پێشێل دەكەن.
جومانە غەلای، وتەبێژی كۆمسیۆن بەپێی ئاژانسی هەواڵی فەرمی کەموتەڵع بەدواداچوونی بۆ کردووە ڕاگەیاندووە : كۆمسیۆن ڕێكاری یاسایی بەرامبەر ئەو كاندیدانە دەگرێتەبەر كە سەرپێچی ڕێساكانی بانگەشەی هەڵبژاردن دەكەن بە شكاندنی ماوەی بێدەنگی هەڵبژاردن، ئاماژەی بەوەشكرد پێژماردنی دارایی بەسەر سەرپێچیكاراندا دەسەپێنرێت.
غەلای ڕوونی كردەوە : كە ماوەی بێدەنگی هەڵبژاردن بریتییە لە خۆبەدوورگرتن لە بڵاوكردنەوە لە ڕێگەی دەزگاكانی ڕاگەیاندن و پلاتفۆرمەكانی سۆشیال میدیا و ئەنجامنەدانی كۆنفرانس یان سیمیناری بانگەشەی هەڵبژاردن و نەناردنی نامەی كورت و بەشدارینەكردن لە هیچ شێوەیەكی تری بڵاوكردنەوە.
ئاماژەی بەوەشكرد : تیمەكانی چاودێری لە فەرمانگەی نیشتمانی و فەرمانگەكانی هەڵبژاردنی پارێزگاكان بەردەوامن لە كارەكانیان لە چاودێریكردنی بانگەشەی هەڵبژاردن و ماوەی بێدەنگی هەڵبژاردن، ئاماژەی بەوەشكرد ئەو تیمانە بە هەماهەنگی لەگەڵ كۆمیسیۆنی ڕاگەیاندن و پەیوەندییەكان و لایەنە پەیوەندیدارەكانی دیكە بەردەوامن لە كارەكانیان.
هەروەها دەستەكە ئەمڕۆ شەممە پشتڕاستی كردەوە : كە دەنگدانی تایبەت لە كاتژمێر 7:00ی بەیانی بە بەشداری زیاتر لە یەك ملیۆن و 300 هەزار دەنگدەر دەستپێدەكات وتەبێژی كۆمسیۆنی باڵای سەربەخۆی هەڵبژاردنەكان، جومانە غەلای لە بەیاننامەیەكی ڕۆژنامەوانیدا كە بە ئاژانسی هەواڵی عێراقی (INA) گەیشتووە و ڕایگەیاندووە: دەنگدانی تایبەت بۆ كارمەندانی سەربازی سبەینێ یەكشەممە كاتژمێر 7:00ی بەیانی دەستپێدەكات و تا كاتژمێر 6:00ی ئێوارە بەردەوام دەبێت، كە1،313،890دەنگدەری سەربازی بەشداری دەكەن، ئاماژەی بەوەشكردووە: 890 ناوەندی دەنگدان بۆ كارمەندانی سەربازی دیاریكراون، كە پێكهاتوون لە 4501 بنكەی دەنگدان.
ئاماژەی بەوەشكرد : دەنگدانی تایبەت بۆ ئاوارەكانیش لە هەمان ڕۆژ لە كاتژمێر 7:00ی بەیانی دەستپێدەكات و تا كاتژمێر 6:00ی ئێوارە بەردەوام دەبێت، لەگەڵ 26,538 دەنگدەری ئاوارە بەشدارن، لە سەرانسەری 27 ناوەندی دەنگدان و 97 بنكەی دەنگدان.