فارس عیسا: کێشەی گەورەی ئێمە لەگەڵ بەغدا عەقلیەتە ئەوان دەیانەوێت بڕیار بدەن و ئێمەش جێبەجێی بکەین

19:45 2025-08-30 33359 عێراق 0

2025-08-30

33359

سەرۆکی نوێنەرایەتی حکومەتی ھەرێمی کوردستان لە بەغدا دەڵێت، “کێشەی گەورەی ئێمە لەگەڵ بەغدا عەقلیەتە، ئەوان دەیانەوێت بڕیار بدەن و ئێمەش جێبەجێی بکەین و دەشڵێت: زۆرینەی دەستکەوتەکانی ڕابردوو لە بەغدا بە یەکدەنگی بەدەست ھاتوون.

فارس عیسا، سەرۆکی نوێنەرایەتی حکومەتی ھەرێمی کوردستان لە بەغدا، بە ماڵپەڕی فەرمیی پارتی کەموتەڵع بەدواداچوونی بۆ کردووە ڕاگەیاند “کێشەی ئێمە لە بەغدا کێشەی عەقلیەتە، گەیشتوونەتە ئەو قەناعەتەی ھەرێمی کوردستان بەرەوپێش ڕۆیشتووە و متمانەیان بە وڵاتێکی دیموکراسی و فیدراڵی نیە، بەپێی دەستووریش ئێمە وڵاتێکی دیموکراسین، بەڵام مامەڵەی ئەوان مەرکەزییە.

ڕاشیگەیاندووە، ئێمە دەستکەوتەکانمان بە یەکڕیزی پاراستووە، لە ڕابردوو و لە حکومەتیش بە یەک تیم کار کراوە، حکومەتی ھەرێمی کوردستان زۆر ھەوڵی داوە کێشەکانی ھەرێم نەگەنە بەغدا، بۆیە بۆ کشانەوەش پێویستە ھەموو فراکسیۆنەکان پێکەوە بکشێنەوە نەک یەک فراکسیۆن.

فارس عیسا وتیشی “بەغدا وەکو ھاووڵاتیی دەرجە دوو تەماشای کورد دەکات و پێی وایە پێویستە ئەوان بڕیار بدەن و ئێمە جێبەجێی بکەین”.

ئاشكراشی كردووە، بۆ پرسی نەوتیش، پێشتر ڕێککەوتن لەنێوان ھەرێم و بەغدا هەبووە بۆ ئەوەی ڕەشنوسێک ئامادەبکرێت و یاسای نەوت و غاز دەربچێت، عێراق لێی پەشیمان بووەوە، لە مانگی شەش کۆبوونەوەیەکی لەگەڵ ئێمە ئەنجام دا و بڕیار درا ئەو نەوتەی بەردەستە لە سەرەتای مانگی حەوت ڕادەستی بەغدا بکرێت، ئێمەش بەغدامان ئاگادار کردەوە، بەڵام عێراق وەری نەگرت، گوایە کێشەی تەکنیکی ھەیە، بۆیە جێگەی داخە عێراق مامەڵەی جیا لەگەڵ ئێمە دەکەن.

باسی لەوەشکرد “ھەندێک لایەن لە عێراق نایانەوێت ھەرێم و بەغدا بگەنە ڕێککەوتن، ئەوەش بووە ھۆی ئەوەی بە درۆن ھێرش بکرێتە سەر کێلگەکانی نەوتی ھەرێم، بۆ ئەوەی کێشەکان ھەر وا بەردەوام بن، ئەوانەی درۆنیان ئاراستەی ھەرێم کردووە دیارن، ئەوانەی درۆنمان ئاراستە دەکەن بەشەو و بەڕۆژ، سەرەخۆشیمان لێ دەکەن، ئەوەی کرا بۆ ئەوە بوو ھەرێم و بەغدا نەگەنە ڕێککەوتن”.

دەشڵێت “وڵاتانیش لەگەڵ ئەوە نین کێشەکانی نێوان ھەرێم و بەغدا بەردەوام بن، ئەوانیش ھەوڵ دەدەن چارەسەر بکرێت، بۆیە ئەگەر ئێمە لە بەغدا یەکدەنگ و یەکڕەنگ بین کێشەکان باشتر چارەسەر دەکرێن، یەکڕیزی کورد دەبێتە فاکتەرێک کێشەکان بەیەکجاری چارەسەر بکرێن، چونکە لە عێراق وا بیردەکەنەوە چەند لە ھەرێمی کوردستان بدەن پێگەی ئەوان بەھێز دەبێت”.