عێراق و تورکیا ڕێگاکانی بەهێزکردنی ئاسایشی سنوور تاوتوێ دەکەن ‏

20:07 2025-10-14 29123 عێراق 0

2025-10-14

29123

عێراق و تورکیا، ڕێگاکانی جێبەجێکردنی ڕێککەوتننامە و یاداشتەکانی لێکتێگەیشتنی واژۆکراو لە نێوان هەردوو وڵاتدا و هەماهەنگیکردنی هەوڵەکان تاوتوێ دەکەن، بە شێوەیەک کە یارمەتیدەر بێت لە بەهێزکردنی ئاسایشی سنوور.
‏
‏ئەمڕۆ سێشەممە، وەزارەتی دەرەوە له‌ راگه‌یندراوێكدا بڵاویکردەوە "محەمەد حوسێن بەحرعلوم، بریكاری وەزارەتی دەرەوە بۆ پەیوەندییە دووقۆڵییەکان، لە بارەگای وەزارەت کۆبوونەوەیەکی لەگەڵ لێژنەی ئەمنیی گرووپی پلاندانانی هاوبەش لەگەڵ تورکیا ئەنجام دا."
‏
‏هه‌روه‌ها ئه‌وه‌یش هاتووه‌ كه‌: "کۆبوونەوەکە بۆ بەدواداچوونی کارەکانی لێژنەی تەکنیکی و ئەمنی بوو کە پەیوەستە بە هەماهەنگیکردنی هەوڵەکانی نێوان هەردوو لایەن لە چوارچێوەی لێژنەی هەمیشەیی هاوبەش بۆ ئاسایش (عێراق – تورکیا)، کە لە ڕێککەوتننامەی ستراتیژیی هاوبەشی نێوان هەردوو وڵات بۆ ساڵی 2024 لێکەوتووەتەوە، بە بەشداریی نوێنەرانی نووسینگەی سەرۆکی ئەنجومەنی وەزیران، وەزارەتەکانی ناوخۆ، بەرگری، کۆچ و کۆچبەران، دەستەی پیشەسازیی جەنگی، جگە لە ژمارەیەک ڕاوێژکار و بەرپرسی پسپۆڕ لە فەرمانگە پەیوەندیدارەکانی وەزارەتی دەرەوە."
‏
‏له‌ راگه‌یندراوه‌كه‌ ئه‌وه‌یش روونكراوه‌ته‌وه‌ كه‌ "کۆبوونەوەکە میکانیزمەکانی هاوکاریی هاوبەش و ڕێگاکانی جێبەجێکردنی ڕێککەوتننامە و یاداشتەکانی لێکتێگەیشتنی واژۆکراو لە نێوان هەردوو وڵاتدا، تاوتوێ کرد، لەگەڵ هەماهەنگیکردنی هەوڵەکانی نێوان دامەزراوە عێراقییە پەیوەندیدارەکان بە کاری لێژنەکە، بە شێوەیەک کە یارمەتیدەر بێت لە بەهێزکردنی ئاسایشی سنوور و پەرەپێدانی هاوکاریی هونەری لەگەڵ لایەنی تورکی، لە چوارچێوەی ڕێککەوتننامە دووقۆڵییەکان و لێکتێگەیشتنە هاوبەشەکاندا."
‏
‏باڵوێز بەحر علوم لە میانی کۆبوونەوەکەدا "جەختی لەسەر پەرۆشیی وەزارەتی دەرەوە کردەوە بۆ کاراکردنی ڕێچکەکانی کاری هاوبەش، بە شێوەیەک کە بەرژەوەندیی نیشتمانیی باڵا بەدی بهێنێت، و یارمەتیدەر بێت لە یەکخستنی هەوڵەکانی حکومەت لە چوارچێوەی دیدی دەوڵەتدا کە ئامانجی بەهێزکردنی پەیوەندییەکانی عێراق لەگەڵ وڵاتانی دراوسێیە."