عێراق و تورکیا لە دەوحە تاوتوێی کەمکردنەوەی گرژییەکان و پتەوکردنی هەماهەنگی هاوبەش دەکەن

16:32 2025-12-07 35884 عێراق 0

2025-12-07

35884

ئەمڕۆ یەکشەممە"فوئاد حوسێن" وەزیری دەرەوە، لەگەڵ "هاکان فیدان"هاوتا تورکییەکەی،گفتوگۆی کرد لەسەر ڕێگاکانی بەهێزکردنی هاوکاری لە بوارەکانی سیاسی و ئابووری و ئەمنی.
بەگوێرەی ڕاگەیەندراوێکی وەزارەتی دەرەوە،کە دەستی ئاژانسی موتەڵع کەوتووە، تیایدا ئاماژەی بەوە داوە: "فوئاد حوسێن" جێگری سەرۆک وەزیران و وەزیری دەرەوە،لە پەراوێزی بەشداریکردنی لە کارەکانی کۆڕبەندی 23 دەوحە ، چاوی بە "هاکان فیدان " وەزیری دەرەوەی تورکیا کەوت.
بەگوێرەی ڕاگەیەندراوەکە : لە میانی دیدارەکەدا گفتوگۆ کرا لەسەر پەیوەندییە دووقۆڵییەکانی نێوان عێراق و تورکیا، و ڕێگاکانی بەهێزکردنی هاوکاری لە بوارەکانی سیاسی و ئابووری و ئەمنی، بەشێوەیەک کە خزمەت بە بەرژەوەندییەکانی هەردوو وڵات بکات و سەقامگیریی هەرێمی بەهێز بکات.
بەگوێرەی ڕاگەیەندراوەکە : هەردوولا باسیان لە پەرەسەندنە هەرێمی و نێودەوڵەتییەکان کرد، بەتایبەتی دۆخی سووریا، کە تیایدا جەختیان کردەوە لەسەر گرنگیی پشتیوانیکردنی هەوڵەکانی بەدیهێنانی سەقامگیریی سیاسی و ئابووری، و هاندانی وەبەرهێنان و دەستپێشخەرییە گەشەپێدانەکان بەشێوەیەک کە بەشدار بێت لە کەمکردنەوەی نەهامەتیی گەلی سووریا.
هەر بەگوێرەی راگەیەندراوەکە : هەردوولا گفتوگۆیان کرد لەسەر دۆسیەی ئێران و پێویستیی کەمکردنەوەی گرژییەکان لە ناوچەکە، و پاڵنان بەرەو چارەسەری سیاسی کە لەسەر بنەمای گفتوگۆ و لێکتێگەیشتن بێت، بەشێوەیەک کە ئاسایشی هەرێمی بەهێز بکات.
راگەیەندراوەکە روونیشیکردەوە : کە "حوسێن" باسی لەچەندین تەوەری گشتگیر لەبارەی پەرەسەندنە سیاسییەکانی عێراق پێشکەش کرد، و ئاماژەیدا بە سەرکەوتنی پرۆسەی هەڵبژاردن و گفتوگۆ بەردەوامەکان بۆ پێکهێنانی حکومەتی نوێ، کە ئەمە ڕەنگدانەوەی پێشکەوتنە لە چەسپاندنی دیموکراسی و بەهێزکردنی سەقامگیریی ناوخۆیی.
لە کۆتایی دیدارەکەدا هەردوولا جەختیان کردەوە لەسەر پەرۆشییان بۆ بەردەوامبوونی هەماهەنگی و ڕاوێژکردن سەبارەت بەو پرسانەی، کە جێی بایەخی هاوبەشن، و بنیاتنانی لەسەر پەیوەندییە مێژوویی و جوگرافییەکانی نێوان هەردوو وڵات.