شاخەوان عەبدوڵلا: هەندێك کەس و لایەن نابەرپرسانە مامەڵەیان لەگەڵ پرسی موچەی فەرمانبەران کرد

10:37 2025-07-19 51191 عێراق 0

2025-07-19

51191

شاخه‌وان عه‌بدوڵا، جێگری دوه‌می سه‌رۆكی په‌رله‌مانی عێراق ڕایگه‌یاند، هەندێك کەس و لایەن کە لەپەنجەکانی دەست تێپەڕناکات نابەرپرسانە مامەڵەیان لەگەڵ پرسی موچەی فەرمانبەران کرد، هەرکات نزیکبونەوە و رێکكەوتن دروست دەبو لێدوانێکی نابەرپرسانەیان بڵاوکردنەوەی داتایەکی نادروست رێکەوتنەکانی دوادەخست تائەو کاتەی دەسەلمێنرا کە ئەو زانیارییە دورە لەراستی.

شاخه‌وان عه‌بدوڵا له‌ په‌یامێكدا کە موتەڵع بەدواداچوونی بۆ کردووە باسی له‌وه‌كردوه‌، "مایەی خۆشحاڵییە دوای 80 رۆژ فەرمانبەرانی هەرێمی کوردستان هەواڵێکی خۆش دەبیستن کە ئەویش خه‌رجکردنی موچەی مانگەکانی 5 و 6ی 2025، ئەگەر هوشیاری خەڵکی کوردستان و درککردنیان بەپیلانی لەناوبردنی ئەزمونی هەرێم و خۆشەویستی بۆ خاک و نیشتیمان نەبێت ئەوە چی ئیرادەیەکە بتوانێت بەرگەی سەختی ژیان و بێ موچەیی بگرێت بۆ ماوەی نزیکەی سێ مانگ".
ئاماژه‌ی به‌وه‌شكردوه‌، "ئەو هەڵوێستەی خەڵکی کوردستان لەکاتێکدا مایەی سوپاس و پێزانینە لەهەمانکاتدا هەمو ئەو دەنگۆیانەی لەگۆڕنا کەدەیانگوت ئینتیمای نیشتیمانی لای خەڵکی هەرێمی کوردستان نەماوە یان لاواز بوە".
شاخه‌وان عه‌بدوڵا ده‌ڵێت، "دیسان ئەوە سەلمێندرا کە هێز لەیەکگرتن و یەک ڕیزییە و چەکێکی بەهێزە بۆ زامنکردنی مافەکانمان و ڕوبەڕوبونەوەی هەر پیلانێک لەدژی خەڵک و خاکی هەرێمی کوردستان".
ئه‌وه‌شی خستوه‌ته‌ڕ، "مایەی داخە هەندێك کەس و لایەن کە لەپەنجەکانی دەست تێپەڕناکات نابەرپرسانە مامەڵەیان لەگەڵ پرسی موچەی فەرمانبەران کرد، بەداخەوە هەرکات نزیکبونەوە و رێکەوتن دروست دەبو لێدوانێکی نابەرپرسانە یان بڵاوکردنەوەی داتایەکی نادروست رێکەوتنەکانی دوادەخست تا ئەوکاتەی دەسەلمێنرا کە ئەو زانیارییە دورە لەراستی، خۆشباوەڕی بەرپرسانی ئیتحادیش بۆ ئەو فەیسبوک چی و لایڤ چیانە لەجێگای خۆی نەبو تاوەکو ئەم دوایانە بۆیان دەرکەوت کە تەنها ئەو داتاو ژمارانە راستن کەلایەن حکومەتەوە و بەفەرمی پێشکەشیان دەکرێت".

شاخه‌وان عه‌بدوڵا نوسیویه‌تی، "پێشنیار دەکەم لەهەر باردۆخێکدا کۆمەڵێک پرنسیب و پیرۆزی و بەهای نیشتیمانی هەیە بیپارێزین و تەجاوزی نەکەین، ناکرێت هێزێکی سیاسی هەبێت یان کەسێک لە هەرێم حەزبکات موچە خه‌رج نەکرێت و خەڵک برسی بکرێت و کێشەکان بەردەوام بێت تەنها بۆ ئەوەی لەهەڵبژاردن سودی لێوەربگرێت".