سەرۆکی هەرێم لەگەڵ كاربەڕێكەری باڵیۆزخانەی ئەمریكا كۆبووەوە

21:57 2025-01-29 42506 كوردستان 0

2025-01-29

42506

ئەمڕۆ چوارشەممە، نێچیرڤان بارزانی سەرۆكی هەرێمی كوردستان، پێشوازیی لە باڵیۆز دانیال ڕوبنستین كرد كە كارەكانی باڵیۆزی ئەمریكا لە عێراق بەڕێوەدەبات.
نوسینگەی راگەیاندنی سەرۆكی هەرێم لە راگەیەنراوێكدا بڵاویکردەوە: لە كۆبوونەوەیەكدا پەیوەندییەكانی ئەمریكا لەگەڵ عێراق و هەرێمی كوردستان، پەیوەندییەكانی هەولێر ـ بەغدا، دۆخی هەرێمی كوردستان، ئەنجامی هەڵبژاردنەكانی پەرلەمان و هەوڵەكانی پێكهێنانی كابینەی نوێی حكوومەتی هەرێمی كوردستان، یەكخستنەوەی پێشمەرگە و پرۆسەی چاكسازی لە وەزارەتی كاروبار‌ی پێشمەرگە، پێشهاتەكانی سوریا و دۆخی ناوچەكە، تاوتوێ كران.
هاوكات باڵیۆز ڕوبنستین جەختی لە پابەندیی ئەمریكا بە بەردەوامیی هاوكاری و پشتگیری لە عێراق و هەرێمی كوردستان كردەوە، و نێچیرڤان بارزانی ـ یش، سوپاس و پێزانینی بۆ هاوكاری و پشتگیریی ئەمریكا لە عێراق و هەرێمی كوردستان، بەتایبەتی لە بەرەنگاربوونەوەی تیرۆردا، دەربڕی.
راگەیەنراوەكە ئاماژەی بۆ ئەوەشكردووە: هەردوولا هاوڕابوون لەسەر گرنگی پاراستنی ئارامی و سەقامگیری لە ناوچەكە و كاركردن بۆ بەرقەراربوونی ئاشتییەكی جێگیر، هەروەها دەربارەی دۆخی ئێزدییان لە شەنگال و كریستیان و پێكهاتەكان لە دەشتی نەینەوا، بیروڕایان گۆڕییەوە.
هەر لە كۆبوونەوەكەدا كە كونسوڵی گشتیی ئەمریكا لە هەرێمی كوردستان ئامادەی بوو، تیشك خرایە سەر چەند پرسێكی دیكەی جێی بایەخی هاوبەش.