سەرۆكی حكومەتی هەرێم لەگەڵ ژمارەیەك لە ئەندامانی كۆنگرێسی ئەمریكا كۆدەبێتەوە

01:03 2024-03-01 41025 كوردستان 0

2024-03-01

41025

مەسرور بارزانی سەرۆكی حكومەتی هەرێمی كوردستان، لە واشنتۆن لەگەڵ ژمارەیەك لە ئەندامانی كۆنگرێسی ئەمریكا كۆبووەوە.
نوسینگەی راگەیاندنی سەرۆكی حكومەتی هەرێم لە راگەیەنراوێكدا بڵاویکردەوە: لە كۆبوونەوەكەدا نانسی پیلۆسی سەرۆكی پێشووی ئەنجومەنی نوێنەرانی ئەمریكا و سێس مێڵتن و دۆن بەیكن و براد وێنسترەپ و ئەماتا كۆلمەن ئەندامانی ئەنجومەنی نوێنەرانی ئەمریكا بەشدار بوون.
ئاشكراشیكرد: لە دەستپێكی كۆبوونەوەكەدا، كۆنگرێسمان بەیكن بە ناوی ئەندامانی كۆنگرێسەوە، بەخێرهاتنی سەرۆكی حكومەتی هەرێمی كرد و وەك جەنگاوەر و خەباتكارێكی ڕێگەی ئازادی ناساند و جەختی لە گرنگی پاراستنی ئاسایش و ئارامی و سەقامگیری هەرێمی كوردستان كردەوە.
لەبەرامبەردا سەرۆكی حكومەتی هەرێمی كوردستان سوپاسی هاریكاری و پشتیوانی ئەمریكای كرد و ئاماژەی بە گرنگی جێبەجێكردنی دەستوور و دابینكردنی مافە دەستوورییەكانی گەلی كوردستان و پاراستن و ڕێزگرتن لە قەوارەی دەستووری و فیدراڵی هەرێمی كوردستان كردەوە.
راگەیەنراوەكە ئاماژەی بۆ ئەوەشكردووە، كە سەرۆكی پێشووی ئەنجومەنی نوێنەرانی ئەمریكا، وێڕای خۆشحاڵی نیشاندان بۆ سەردانی سەرۆكی حكومەتی هەرێم بۆ ئەمریكا، وتی: ڕێز و پێزانینمان بۆ ئازایەتی و قارەمانیێتی و خەبات و قوربانیدانەكانی خەڵكی كوردستان هەیە.
هاوكات گۆنگرێسمان مۆڵتن دووپاتیكردەوە: كە ئێمە بە هەموو شێوەیەك لەگەڵ بەهێزبوونی هەرێمی كوردستانین.