سەرۆك کۆمار پیرۆزبایی کردنەوەی بارەگای مەکتەبی سیاسی یەکێتیی نیشتمانیی کوردستانی لە بەغداد کرد

22:58 2024-04-25 29178 عێراق 0

2024-04-25

29178

سەرۆك کۆمار د.لەتیف جەمال رەشید پێشوازیکرد لە بەڕێزان سەرکەوت زەکی لێپرسراوی مەکتەبی رێکخستنی یەکێتیی نیشتمانیی کوردستان و رزگار حەمەئەمین ئەندامی مەکتەبی سیاسیی یەکێتیی نیشتمانیی کوردستان.
بەگوێرەی ڕاگەیەندراوێکی سەرۆکایەتی کۆمار لە سەرەتای دیدارەکەدا، کە لە کۆشکی سەلام لە بەغداد بەڕێوەچو، سەرۆك کۆمار پیرۆزبایی کردنەوەی بارەگای مەکتەبی سیاسی یەکێتیی نیشتمانیی کوردستانی لە بەغداد کرد و بە هەنگاوێکی ئەرێنی وەسفکرد بۆ پەرەپێدانی هاریکاری و هاوئاهەنگی نێوان هەموو هێزە سیاسی و کۆمەڵایەتییەکان لەپێناو چەسپاندنی ئەو دەستکەوتانەی لە ئاستە جیاوازەکاندا بەدەستهاتوون، بەتایبەتی ئەوانەی پەیوەستن بە پێداویستیی هاووڵاتیان و باشترکردنی بارودۆخی گشتی بژێوی و خزمەتگوزارییەکان و چەسپاندنی ئاسایش و سەقامگیری لە وڵاتدا.
سەرۆك کۆمار ئاماژەیکرد بە گرنگی بەرەوپێشبردنی دیالۆگ لەنێوان حکومەتی فیدراڵی و حکومەتی هەرێمی کوردستان بۆ یەکلاکردنەوەی پرسە هەڵپەسێردراوەکان بەگوێرەی دەستور و یاسا و رەچاوکردنی مافی تەواوی سەرجەم هاووڵاتیان لەلای حکومەتی فیدراڵ و هەرێمی کوردستان.
لای خۆیشیانەوە بەڕێزان سەرکەوت زەکی و رزگار حەمەئەمین سوپاس و پێزانینی خۆیان بۆ بەڕێز سەرۆك کۆمار دەربڕی بۆ پیرۆزباییەکەی سەبارەت بە کردنەوەی بارەگای مەکتەبی سیاسی یەکێتیی نیشتمانیی کوردستان، هەروەها تێڕوانینەکانی بەڕێز سەرۆك کۆماریان بۆ چەسپاندنی سەقامگیری لە وڵات و پەرەپێدانی هاریکاری نێوان هێزە سیاسییەکان لە خزمەتی هاووڵاتیاندا، بەرزنرخاند.