سودانی:ئەم حکومەتە بە یەک ئاڕاستەدا کار ناکات بەڵکو کۆمەڵێک دۆسیەی هەیە لە هەموو ئاڕاستەکاندا

22:32 2024-04-10 29439 عێراق 0

2024-04-10

29439

سەرۆکی ئەنجومەنی وەزیران مەحەمەد شەیاع سودانى، ئەمڕۆ چوارشەممە،جەختیکردەوە ئەم حکومەتە بە یەک ئاڕاستەدا کار ناکات، بەڵکو کۆمەڵێک دۆسیەی هەیە لە هەموو ئاڕاستەکاندا.

نوسینگەی راگەیاندنی سەرۆک وەزیران لە بەیاننامەیەکدا رایگەیاند:- سەرۆک وەزیران پێشوازی کرد لە وەزیر و سەرۆک دەستە و بریکاری وەزارەتەکان و فەرماندە سەربازی و ئەمنییەکان لە پێکهاتە جیاجیاکانی هێزە چەکدارەکانمان، هەروەها پێشوازی کرد لە سەرۆک سەندیکاکان و ژمارەیەک لە سەرۆک هۆز و کەسایەتییە دیارەکانی پارێزگای بەغدا بەبۆنەی جەژنی ڕەمەزانی پیرۆزەوە.

ئاماژەی بەوەکرد,,سودانی پیرۆزبایی لە ئامادەبووان کرد و داوای کرد لە خوای گەورە عێراق و عێراقییەکان بپارێزێت لەگەڵ بەردەوام بوونی ئاسایش و سەقامگیری بەسەر نیشتمان و گەلەکەماندا.

سەرۆکی ئەنجومەنی وەزیران جەختی لەوە کردەوە کە ئاسایش و سەقامگیری پێویستی بەوە هەیە دەوڵەت بەرهەمدار و سەقامگیر بێت و ئەرکەکانی بە شێوەیەکی دروست جێبەجێ بکات و ئاماژەی بەوەشکرد کە حکومەت بە قۆناغ کار لەسەر ئەم دەستکەوتانە دەکات و لە سەرەتای کارەکانیدا تیشکی خستە سەر خزمەتگوزارییەکان، بەمەبەستی دڵنیاکردنەوەی هاوڵاتیان لە جددیەت و پابەندبوونی حکومەت بە بەرنامەکەیەوە.

سودانی جەختی لەوە کردەوە کە ئەم حکومەتە بە یەک ئاڕاستەدا کار ناکات، بەڵکو کۆمەڵێک دۆسیەی هەیە لە هەموو ئاڕاستەکاندا، لەوانە پرسە سەرەکییەکانی پەیوەست بە ڕاستکردنەوەی ڕێگا ئابوورییەکانی دەوڵەت و کار دەکات بۆ چارەسەرکردنیان، چوونکە کاریگەرییەکی گەورەی دەبێت لەسەر دەوڵەت لە داهاتوودا.

هەروەها ئاماژەی بە هەوڵەکانی حکومەت کرد لە پڕچەککردن و مۆدێرنکردنی سوپای عێراق و هێزە چەکدارەکانی و پەرەپێدانی دەزگا ئەمنییەکانی ناوخۆ، هەروەها جەختی لەوە کردەوە کە بەهێزکردنی دڵنیایی لە کاری دامەزراوە و وەزارەتە خزمەتگوزارییەکان دەبێتە هۆی دڵنیا کردنەوەی وەبەرهێنەران و بازرگانان لە ناوەوە و دەرەوەی عێراق و جەختیشی کردەوە ئەوەی کە لە ڕووی ئاسایش و سەقامگیرییەوە بەدەست هاتووە لە سایەی خوێنی شەهیدان و قوربانییەکانیانە.