ساڤایا له‌باره‌ی هێرشه‌كه‌ی كۆرمۆر: روبه‌ڕوی هه‌ر گروپێكی چه‌كداری نایاسایی ده‌بینه‌وه‌ له‌ عێراق

22:07 2025-11-27 23614 عێراق 0

2025-11-27

23614

مارك ساڤایا، نێرده‌ی تایبه‌تی دۆناڵد تره‌مپ، سه‌رۆكی ئه‌مریكا بۆ كاروباری عێراق له‌باره‌ی هێرشه‌كه‌ی سه‌ر كێلگه‌ی كۆرمۆر رایده‌گه‌یه‌نێت كه‌ ده‌بێت حكومه‌تی عێراق ناسنانه‌ی هێرشكاره‌كان ده‌ستنیشان بكات و ده‌شڵێت، شوێنپێی هه‌مو گروپه‌ چه‌كداره‌ نایاساییه‌كان له‌عێراق هه‌ڵده‌گرین، روبه‌ڕویان ده‌بینه‌وه‌و سزایان ده‌ده‌ین.

مارك ساڤایا، ئه‌مڕۆ پێنجشه‌ممه‌، له‌ راگه‌یه‌ندراوێكدا وتی، "ئه‌و گروپه‌ چەکدارانه‌ی کە بە شێوەیەکی نایاسایی و بە ئەجێندای ده‌ره‌كی و دوژمنکارانە دەجوڵێنه‌وه‌، دوێنێ هێرشیان كرده‌ سەر کێڵگەی غازی كۆرمۆ."

ئاماژه‌ی به‌وه‌شداوه‌"ده‌بێت حکومەتی عێراق ناسنامه‌ی ئه‌وانه‌ دەستنیشان بکات کە بەرپرسیارن لەم هێرشە و روبه‌ڕوی دادگایان بكاته‌وه‌."

جه‌ختیشی كردۆته‌وه‌"با ئه‌مه‌ زۆر رون بێت: هیچ شوێنێك بۆ گروپه‌ چه‌كداره‌كان نییه‌ له‌ عێراقێكی خاوه‌ن سه‌روه‌ریی ته‌واودا. ئه‌مریكا به‌ته‌واوه‌تی پشتیوانی له‌مه‌ ده‌كات. شوێنپێی هه‌مو گروپه‌ چه‌كداره‌ نایاساییه‌كان و هه‌مو پشتیوانیكارانیان هه‌ڵده‌گرین، روبه‌ڕویان ده‌بینه‌وه‌و سزایان ده‌ده‌ین."

ساڤایا وتوشیه‌تی"ئەمریکا پشتیوانی لە کوردستانێکی بەهێز دەکات لە چوارچێوەی عێراقێکی یەکگرتو و سەقامگیردا. هانی بەغدا و هەولێر دەدەین کە هاوکارییە ئەمنییەکانی نێوانیان قوڵتربکەنەوەو لە نزیکەوە کاربکەن بۆ پاراستنی ژێرخانی سه‌ره‌كی ئابوری و وزە."

نێرده‌ی تره‌مپ هێمای بۆ ئه‌وه‌ش كردوه‌ "ویلایەتە یەکگرتوەکانی ئەمەریکا پابەندبونی پتەوی خۆی بۆ هاوکاریکردنی حکومەتی عێراق لە بەرزکردنەوەی توانا بەرگرییه‌كانی و بنیاتنانی هێزە نیشتمانییەکانی دوپاتدەکاتەوە."

وتوشیه‌تی"پێکەوە بەردەوام دەبین لە پاراستنی سەرچاوەکانی عێراق و بەرگریکردن لە سەروەری عێراق و دەستەبەرکردنی ئاسایش و خۆشگوزەرانی بۆ هەمو هاوڵاتیانی."